[575] Sayameva sāmaṃ manasābhisittoti sayameva attānaṃ cittena abhisiñcati ahamasmi kusalo paṇḍito paññavā buddhimā ñāṇī vibhāvī medhāvīti sayameva sāmaṃ manasābhisitto.

[576] Diṭṭhī hi sā tassa tathā samattāti tassa sā diṭṭhi tathā samattā samādinnā gahitā parāmaṭṭhā abhiniviṭṭhā ajjhositā adhimuttāti diṭṭhī hi sā tassa tathā samattā . Tenāha bhagavā atīsaraṃdiṭṭhiyā so samatto mānena matto paripuṇṇamānī sayameva sāmaṃ manasābhisitto diṭṭhī hi sā tassa tathā samattāti.

[577] Parassa ce hi vacasā nihīno tumo sahā hoti nihīnapañño Athavā sayaṃ vedagū hoti dhīro na koci bālo samaṇesu atthi.

[578] Parassa ce hi vacasā nihīnoti parassa ce vācāya vacanena ninditakāraṇā garahitakāraṇā upavaditakāraṇā paro bālo hoti hīno nihīno omako lāmako jatukko parittoti parassa ce hi vacasā nihīno.