[579] Tumo sahā hoti nihīnapaññoti sopi teneva saha hoti hīnapañño nihīnapañño omakapañño lāmakapañño jatukkapañño parittapaññoti tumo sahā hoti nihīnapañño.

[580] Athavā sayaṃ vedagū hoti dhīroti dhīro paṇḍito paññavā buddhimā ñāṇī vibhāvī medhāvīti athavā sayaṃ vedagū hoti dhīro.

[581] Na koci bālo samaṇesu atthīti samaṇesu na koci bālo hīno nihīno omako lāmako jatukko paritto atthi sabbeva aggapaññā seṭṭhapaññā viseṭṭhapaññā pāmokkhapaññā uttamapaññā pavarapaññāti na koci bālo samaṇesu atthi . Tenāha bhagavā parassa ce hi vacasā nihīno tumo sahā hoti nihīnapañño athavā sayaṃ vedagū hoti dhīro na koci bālo samaṇesu atthīti.

[582] Aññaṃ ito yābhivadanti dhammaṃ aparaddhā suddhimakevalī te evampi titthyā puthuso vadanti sandiṭṭhirāgena hi tyābhirattā.