[583] Aññaṃ ito yābhivadanti dhammaṃ aparaddhā suddhimakevalī teti ito aññaṃ dhammaṃ diṭṭhiṃ paṭipadaṃ maggaṃ ye abhivadanti te suddhimaggaṃ visuddhimaggaṃ parisuddhimaggaṃ vodātamaggaṃ pariyodātamaggaṃ viraddhā aparaddhā khalitā gaḷitā aññāya aparaddhā akevalī te asamattā aparipuṇṇā te hīnā nihīnā omakā lāmakā jatukkā parittāti aññaṃ ito yābhivadanti dhammaṃ aparaddhā suddhimakevalī te.

[584] Evampi titthyā puthuso vadantīti titthaṃ vuccati diṭṭhigataṃ. Titthyā vuccanti diṭṭhigatikā . puthudiṭṭhiyā puthudiṭṭhigatāni vadanti kathenti bhaṇanti dīpayanti voharantīti evampi titthyā puthuso vadanti.

[585] Sandiṭṭhirāgena hi tyābhirattāti sakāya diṭṭhiyā rāgena rattā abhirattāti sandiṭṭhirāgena hi tyābhirattā. Tenāha bhagavā aññaṃ ito yābhivadanti dhammaṃ aparaddhā suddhimakevalī te Evampi titthyā puthuso vadanti sandiṭṭhirāgena hi tyābhirattāti.

[586] Idheva suddhiṃ iti vādayanti nāññesu dhammesu visuddhimāhu evampi titthyā puthuso niviṭṭhā sakāyane tattha daḷhaṃ vadānā.