[604] Atho pasaṃsampi labhanti tatthāti tattha sakāya diṭṭhiyā sakāya khantiyā sakāya ruciyā sakāya laddhiyā pasaṃsaṃ thomanaṃ kittiṃ vaṇṇahārikaṃ labhanti paṭilabhanti [1]- adhigacchanti vindantīti atho pasaṃsampi labhanti tattha. Tenāha so nimmito yekecime diṭṭhiparibbasānā idameva saccanti pavādayanti sabbeva te nindamanvānayanti atho pasaṃsampi labhanti tatthāti.

[605] Appaṃ hi etaṃ na alaṃ samāya duve vivādassa phalāni brūmi etampi disvā na vivādayetha khemābhipassaṃ avivādabhummaṃ .

[606] Appaṃ hi etaṃ na alaṃ samāyāti appaṃ hi etanti appakaṃ etaṃ omakaṃ etaṃ thokaṃ etaṃ lāmakaṃ etaṃ jatukkaṃ etaṃ parittakaṃ etanti appaṃ hi etaṃ . na alaṃ samāyāti nālaṃ Rāgassa samāya dosassa samāya mohassa samāya kodhassa upanāhassa makkhassa paḷāsassa issāya macchariyassa māyāya sāṭheyyassa thambhassa sārambhassa mānassa atimānassa madassa pamādassa sabbakilesānaṃ sabbaduccaritānaṃ sabbadarathānaṃ sabbapariḷāhānaṃ sabbasantāpānaṃ sabbākusalābhisaṅkhārānaṃ samāya upasamāya vūpasamāya nibbānāya paṭinissaggāya paṭippassaddhiyāti appaṃ hi etaṃ na alaṃ samāya.

[607] Duve vivādassa phalāni brūmīti diṭṭhikalahassa diṭṭhibhaṇḍanassa diṭṭhiviggahassa diṭṭhivivādassa diṭṭhimedhagassa dve phalāni honti jayaparājayo hoti lābhālābho hoti yasāyaso hoti nindāpasaṃso hoti sukhadukkhaṃ hoti somanassadomanassaṃ hoti iṭṭhāniṭṭhaṃ hoti anunayapaṭighaṃ hoti ugghātinigghāti hoti anurodhavirodho hoti . Athavā taṃ kammaṃ nirayasaṃvattanikaṃ tiracchānayonikasaṃvattanikaṃ pittivisayikasaṃvattanikanti brūmi ācikkhāmi desemi paññāpemi paṭṭhapemi vivarāmi vibhajāmi uttānīkaromi pakāsemīti duve vivādassa phalāni brūmi.