[608] Etampi disvā na vivādayethāti etampi disvāti etaṃ ādīnavaṃ disvā passitvā tulayitvā tīrayitvā vibhāvayitvā vibhūtaṃ katvā diṭṭhikalahesu diṭṭhibhaṇḍanesu diṭṭhiviggahesu diṭṭhivivādesu diṭṭhimedhagesūti etampi disvā . na vivādayethāti na Kalahaṃ kareyya na bhaṇḍanaṃ kareyya na viggahaṃ kareyya na vivādaṃ kareyya na medhagaṃ kareyya kalahabhaṇḍanaviggahavivādamedhagaṃ pajaheyya vinodeyya byantīkareyya anabhāvaṅgameyya kalahabhaṇḍanaviggaha- vivādamedhagā ārato assa virato paṭivirato nikkhanto nissaṭṭho vippamutto visaññutto vimariyādikatena cetasā vihareyyāti etampi disvā na vivādayetha.

[609] Khemābhipassaṃ avivādabhummanti avivādabhummaṃ vuccati amatanibbānaṃ yo so sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānaṃ . etaṃ avivādabhummaṃ khemato tāṇato leṇato saraṇato abhayato accutato amatato nibbānato passanto dakkhanto olokento nijjhāyanto upaparikkhantoti khemābhipassaṃ avivādabhummaṃ. Tenāha bhagavā appaṃ hi etaṃ na alaṃ samāya duve vivādassa phalāni brūmi etampi disvā na vivādayetha khemābhipassaṃ avivādabhummanti.

[610] Yākācimā sammatiyo puthujjā sabbāva etā na upeti viddhā anūpayo so upayaṃ kimeyya diṭṭhe sute khantimakubbamāno.

[611] Yākācimā sammatiyo puthujjāti yākācīti sabbena sabbaṃ sabbathā sabbaṃ asesaṃ nissesaṃ pariyādāyavacanametaṃ yākācīti . Sammatiyoti sammatiyo vuccanti dvāsaṭṭhī diṭṭhigatāni . puthujjāti puthujjanehi janitā vā tā sammatiyoti puthujjā . puthunānājanehi janitā vā tā sammatiyoti puthujjāti yākācimā sammatiyo puthujjā.