[4] Addhā pītimano hotīti addhāti ekaṃsavacanaṃ nissaṃsayavacanaṃ nikkaṅkhavacanaṃ advejjhavacanaṃ adveḷhakavacanaṃ niyogavacanaṃ apaṇṇakavacanaṃ avatthāpanavacanametaṃ addhāti . pītīti yā pañcakāmaguṇapaṭisaññuttā pīti pāmujjaṃ āmodanā pamodanā hāso pahāso vitti tuṭṭhi odagyaṃ attamanatā [2]- abhipūraṇatā cittassa . manoti yaṃ cittaṃ mano mānasaṃ hadayaṃ paṇḍaraṃ mano manāyatanaṃ manindriyaṃ viññāṇaṃ viññāṇakkhandho tajjā manoviññāṇadhātu ayaṃ vuccati mano . Ayaṃ mano imāya pītiyā sahagato hoti sahajāto saṃsaṭṭho sampayutto ekuppādo ekanirodho ekavatthuko ekārammaṇo . pītimano hotīti tuṭṭhamano haṭṭhamano pahaṭṭhamano attamano udaggamano samuditamano hotīti addhā pītimano hoti.

[5] Laddhā macco yadicchatīti laddhāti laddhā labhitvā paṭilabhitvā adhigantvā vinditvā . maccoti satto naro mānavo poso puggalo jīvo jātu jantu indagu manujo. Yadicchatīti yaṃ icchati yaṃ sādiyati yaṃ pattheti yaṃ piheti yaṃ abhijappati rūpaṃ vā saddaṃ vā gandhaṃ vā rasaṃ vā phoṭṭhabbaṃ vāti laddhā macco yadicchati . Tenāha bhagavā kāmaṃ kāmayamānassa tassa ce taṃ samijjhati addhā pītimano hoti laddhā macco yadicchatīti.

[6] Tassa ce kāmayamānassa chandajātassa jantuno te kāmā parihāyanti sallaviddhova ruppati.

[7] Tassa ce kāmayamānassāti tassa ceti tassa khattiyassa vā brāhmaṇassa vā vessassa vā suddassa vā gahaṭṭhassa vā pabbajitassa vā devassa vā manussassa vā . kāmayamānassāti kāmayamānassa icchamānassa sādiyamānassa patthayamānassa pihayamānassa abhijappamānassa . athavā kāmataṇhāya yāyati niyyati vuyhati saṃhariyati . yathā hatthiyānena vā assayānena vā goyānena vā ajayānena vā meṇḍakayānena vā oṭṭhayānena vā kharayānena vā yāyati niyyati vuyhati saṃhariyati evameva kāmataṇhāya yāyati niyyati vuyhati saṃhariyatīti tassa ce kāmayamānassa.