[616] Sīluttamā saññamenāhu suddhinti santeke samaṇabrāhmaṇā sīluttamavādā te sīlamattena saññamamattena saṃvaramattena avītikkamamattena suddhiṃ visuddhiṃ parisuddhiṃ muttiṃ vimuttiṃ parimuttiṃ āhu vadanti kathenti bhaṇanti dīpayanti voharanti . Samaṇamuṇḍikāputto evamāha catūhi kho ahaṃ thapati dhammehi samannāgataṃ purisapuggalaṃ paññāpemi sampannakusalaṃ paramakusalaṃ uttamappattippattaṃ samaṇaṃ ayojjhaṃ katamehi catūhi idha thapati na kāyena pāpakammaṃ karoti na pāpikaṃ vācaṃ bhāsati na pāpakaṃ saṅkappaṃ saṅkappati na pāpakaṃ ājīvaṃ ājīvati imehi kho ahaṃ Thapati catūhi dhammehi samannāgataṃ purisapuggalaṃ paññāpemi sampannakusalaṃ paramakusalaṃ uttamappattippattaṃ samaṇaṃ ayojjhaṃ . Evameva santeke samaṇabrāhmaṇā sīluttamavādā te sīlamattena saññamamattena saṃvaramattena avītikkamamattena suddhiṃ visuddhiṃ parisuddhiṃ muttiṃ vimuttiṃ parimuttiṃ āhu vadanti kathenti bhaṇanti dīpayanti voharantīti sīluttamā saññamenāhu suddhiṃ.

[617] Vattaṃ samādāya upaṭṭhitāseti vattanti hatthivattaṃ vā assavattaṃ vā govattaṃ vā ajavattaṃ vā kukkuravattaṃ vā kākavattaṃ vā vāsudevavattaṃ vā [1]- puṇṇabhaddavattaṃ vā maṇibhaddavattaṃ vā aggivattaṃ vā nāgavattaṃ vā supaṇṇavattaṃ vā yakkhavattaṃ vā asuravattaṃ vā gandhabbavattaṃ vā mahārājavattaṃ vā candavattaṃ vā suriyavattaṃ vā indavattaṃ vā brahmavattaṃ vā devavattaṃ vā disavattaṃ vā ādāya samādāya ādayitvā gaṇhitvā parāmasitvā abhinivisitvā upaṭṭhitā paccupaṭṭhitā allīnā upagatā ajjhositā adhimuttāti vattaṃ samādāya upaṭṭhitāse.

[618] Idheva sikkhema athassa suddhinti idhāti sakāya diṭṭhiyā sakāya khantiyā sakāya ruciyā sakāya laddhiyā sikkhema ācarema samācarema samādāya vattemāti idheva sikkhema . athassa suddhinti athavāssa suddhiṃ visuddhiṃ parisuddhiṃ muttiṃ vimuttiṃ parimuttinti idheva sikkhema athassa suddhiṃ.