[619] Bhavūpanītā kusalāvadānāti bhavūpanītāti bhavūpanītā bhavūpagatā bhavajjhositā bhavādhimuttāti bhavūpanītā . kusalāvadānāti kusalavādā paṇḍitavādā dhīravādā ñāṇavādā hetuvādā lakkhaṇavādā kāraṇavādā ṭhānavādā sakāya laddhiyāti bhavūpanītā kusalāvadānā. Tenāha bhagavā sīluttamā saññamenāhu suddhiṃ vattaṃ samādāya upaṭṭhitāse idheva sikkhema athassa suddhiṃ bhavūpanītā kusalāvadānāti.

[620] Sace cuto sīlavatāto hoti sa vedhatī kamma virādhayitvā sa jappatī patthayatī ca suddhiṃ satthāvahīno pavasaṃ gharamhā.

[621] Sace cuto sīlavatāto hotīti dvīhi kāraṇehi sīlabbatato cavati paravicchindanāya vā cavati anabhisambhuṇanto vā cavati. {621.1} Kathaṃ paravicchindanāya cavati . paro vicchindati so satthā na sabbaññū dhammo na svākkhāto gaṇo na supaṭipanno diṭṭhi na bhaddikā paṭipadā na supaññattā maggo na niyyāniko natthettha suddhi vā visuddhi vā parisuddhi vā mutti vā vimutti vā Parimutti vā na tattha sujjhanti vā visujjhanti vā parisujjhanti vā muccanti vā vimuccanti vā parimuccanti vā hīnā nihīnā omakā lāmakā jatukkā parittāti evaṃ paro vicchindati. Evaṃ vicchindiyamāno satthārā cavati dhammakkhānā cavati gaṇā cavati diṭṭhiyā cavati paṭipadāya cavati maggato cavati evaṃ paravicchindanāya cavati. {621.2} Kathaṃ anabhisambhuṇanto cavati . sīlaṃ anabhisambhuṇanto sīlato cavati vattaṃ anabhisambhuṇanto vattato cavati sīlabbataṃ anabhisambhuṇanto sīlabbatato cavati evaṃ anabhisambhuṇanto cavatīti sace cuto sīlavatāto hoti.

[622] Sa vedhatī kamma virādhayitvāti sa vedhatīti sīlaṃ vā vattaṃ vā sīlabbataṃ vā viraddhaṃ mayā aparaddhaṃ mayā khalitaṃ mayā gaḷitaṃ mayā aññāya aparaddho ahanti vedhati pavedhati sampavedhatīti sa vedhatī . kamma virādhayitvāti puññābhisaṅkhāraṃ vā apuññābhisaṅkhāraṃ vā āneñjābhisaṅkhāraṃ vā viraddhaṃ mayā aparaddhaṃ mayā khalitaṃ mayā gaḷitaṃ mayā aññāya aparaddho ahanti vedhati pavedhati sampavedhatīti sa vedhatī kamma virādhayitvā.