[623] Sa jappatī patthayatī ca suddhinti sa jappatīti sīlaṃ vā jappati vattaṃ vā jappati sīlabbataṃ vā jappati pajappati abhijappatīti sa jappatī . patthayatī ca suddhinti sīlasuddhiṃ vā pattheti vattasuddhiṃ vā pattheti sīlabbatasuddhiṃ vā pattheti piheti Abhijappatīti sa jappatī patthayatī ca suddhiṃ.

[624] Satthāvahīno pavasaṃ gharamhāti yathā puriso gharato nikkhanto satthena saha vasanto satthā ohīno taṃ vā satthaṃ anubandhati sakaṃ vā gharaṃ paccāgacchati evameva so diṭṭhigatiko taṃ vā satthāraṃ gaṇhāti aññaṃ vā satthāraṃ gaṇhāti taṃ vā dhammakkhānaṃ gaṇhāti aññaṃ vā dhammakkhānaṃ gaṇhāti taṃ vā gaṇaṃ gaṇhāti aññaṃ vā gaṇaṃ gaṇhāti taṃ vā diṭṭhiṃ gaṇhāti aññaṃ vā diṭṭhiṃ gaṇhāti taṃ vā paṭipadaṃ gaṇhāti aññaṃ vā paṭipadaṃ gaṇhāti taṃ vā maggaṃ gaṇhāti aññaṃ vā maggaṃ gaṇhāti parāmasati abhinivisatīti satthāvahīno pavasaṃ gharamhā . Tenāha bhagavā sace cuto sīlavatāto hoti sa vedhatī kamma virādhayitvā sa jappatī patthayatī ca suddhiṃ satthāvahīno pavasaṃ gharamhāti.

[625] Sīlabbataṃ vāpi pahāya sabbaṃ kammañca sāvajjanavajjametaṃ suddhiṃ asuddhinti apatthayāno virato care santimanuggahāya.

[626] Sīlabbataṃ vāpi pahāya sabbanti sabbā sīlasuddhiyo Pahāya pajahitvā vinoditvā byantīkaritvā anabhāvaṅgamitvā sabbā vattasuddhiyo pahāya pajahitvā vinoditvā byantīkaritvā anabhāvaṅgamitvā sabbā sīlabbatasuddhiyo pahāya pajahitvā vinoditvā byantīkaritvā anabhāvaṅgamitvāti sīlabbataṃ vāpi pahāya sabbaṃ.