[627] Kammañca sāvajjanavajjametanti sāvajjakammaṃ vuccati kaṇhaṃ kaṇhavipākaṃ . anavajjakammaṃ vuccati sukkaṃ sukkavipākaṃ . Sāvajjañca kammaṃ anavajjañca kammaṃ pahāya pajahitvā vinoditvā byantīkaritvā anabhāvaṅgamitvāti kammañca sāvajjanavajjametaṃ.

[628] Suddhiṃ asuddhinti apatthayānoti asuddhiṃ patthenti akusale dhamme patthenti suddhiṃ patthenti pañca kāmaguṇe patthenti asuddhiṃ patthenti akusale dhamme patthenti pañca kāmaguṇe patthenti suddhiṃ patthenti dvāsaṭṭhīdiṭṭhigatāni patthenti asuddhiṃ patthenti akusale dhamme patthenti pañca kāmaguṇe patthenti dvāsaṭṭhīdiṭṭhigatāni patthenti suddhiṃ patthenti tedhātuke kusale dhamme patthenti asuddhiṃ patthenti akusale dhamme patthenti pañca kāmaguṇe patthenti dvāsaṭṭhīdiṭṭhigatāni patthenti tedhātuke kusale dhamme patthenti suddhiṃ patthenti kalyāṇaputhujjanā niyāmāvakkantiṃ patthenti sekkhā aggadhammaṃ arahattaṃ patthenti . Arahattappatte arahā neva akusale dhamme pattheti napi pañca kāmaguṇe pattheti napi dvāsaṭṭhīdiṭṭhigatāni pattheti napi tedhātuke Kusale dhamme pattheti napi niyāmāvakkantiṃ pattheti napi aggadhammaṃ arahattaṃ pattheti . patthanaṃ samatikkanto arahā vuḍḍhiparihāniṃ vītivatto . so vuṭṭhavāso ciṇṇacaraṇo .pe. natthi tassa punabbhavoti suddhiṃ asuddhinti apatthayāno.

[629] Virato care santimanuggahāyāti viratoti suddhiasuddhiyā ārato virato paṭivirato nikkhanto nissaṭṭho vippamutto visaññutto vimariyādikatena cetasā viharatīti virato. Careti careyya vicareyya iriyeyya vatteyya pāleyya yapeyya yāpeyyāti virato care. Santimanuggahāyāti santiyo vuccanti dvāsaṭṭhī diṭṭhigatāni diṭṭhisantiyo aggaṇhanto aparāmasanto anabhinivisantoti virato care santimanuggahāya . tenāha bhagavā sīlabbataṃ vāpi pahāya sabbaṃ kammañca sāvajjanavajjametaṃ suddhiṃ asuddhinti apatthayāno virato care santimanuggahāyāti.