[630] Tamūpanissāya jigucchitaṃ vā atha vāpi diṭṭhaṃva sutaṃ mutaṃ vā uddhaṃsarā suddhimanutthunanti avītataṇhāse bhavābhavesu.

[631] Tamūpanissāya jigucchitaṃ vāti santeke samaṇabrāhmaṇā tapojigucchavādā tapojigucchasārā tapojigucchaṃ nissitā sannissitā allīnā upagatā ajjhositā adhimuttāti tamūpanissāya jigucchitaṃ vā.

[632] Athavāpi diṭṭhaṃva sutaṃ mutaṃ vāti diṭṭhaṃ vā diṭṭhasuddhiṃ vā sutaṃ vā sutasuddhiṃ vā mutaṃ vā mutasuddhiṃ vā nissāya upanissāya gaṇhitvā parāmasitvā abhinivisitvāti athavāpi diṭṭhaṃva sutaṃ mutaṃ vā.

[633] Uddhaṃsarā suddhimanutthunantīti santeke samaṇabrāhmaṇā uddhaṃsarāvādā . katame [1]- samaṇabrāhmaṇā uddhaṃsarāvādā . Ye te samaṇabrāhmaṇā accantasuddhikā saṃsārasuddhikā akiriyadiṭṭhikā sassatavādā ime te samaṇabrāhmaṇā uddhaṃsarāvādā . te saṃsārena suddhiṃ visuddhiṃ parisuddhiṃ muttiṃ vimuttiṃ parimuttiṃ anutthunanti vadanti kathenti bhaṇanti dīpayanti voharantīti uddhaṃsarā suddhimanutthunanti.