[638] Cutūpapāto idha yassa natthīti yassāti arahato khīṇāsavassa āgamanaṃ gamanaṃ gamanāgamanaṃ kālaṃ gati bhavābhavo cuti ca upapatti ca nibbatti ca bhedo ca jātijarāmaraṇaṃ natthi na santi na saṃvijjanti nupalabbhanti pahīnā samucchinnā vūpasantā paṭippassaddhā abhabbuppattikā ñāṇagginā daḍḍhāti cutūpapāto idha yassa natthi.

[639] Sa kena vedheyya kuhiṃ pajappeti so kena rāgena vedheyya kena dosena vedheyya kena mohena vedheyya kena mānena vedheyya kāya diṭṭhiyā vedheyya kena uddhaccena vedheyya kāya vicikicchāya vedheyya kehi anusayehi vedheyya rattoti vā duṭṭhoti vā mūḷhoti vā vinibandhoti vā parāmaṭṭhoti vā vikkhepagatoti vā aniṭṭhaṅgatoti vā thāmagatoti vā . te abhisaṅkhārā pahīnā abhisaṅkhārānaṃ pahīnattā gatiyā kena vedheyya nerayikoti vā tiracchānayonikoti vā pittivisayikoti vā manussoti vā devoti vā rūpīti vā arūpīti vā saññīti vā asaññīti vā nevasaññīnāsaññīti vā . so hetu natthi paccayo natthi kāraṇaṃ natthi yena vedheyya pavedheyya Sampavedheyyāti sa kena vedheyya . kuhiṃ pajappeti kimhi jappeyya pajappeyya abhijappeyyāti sa kena vedheyya kuhiṃ pajappe . Tenāha bhagavā patthayamānassa hi jappitāni saṃvedhitaṃ vāpi pakappitesu cutūpapāto idha yassa natthi sa kena vedheyya kuhiṃ pajappeti.

[640] Yamāhu dhammaṃ paramanti eke tameva hīnanti panāhu aññe sacco nu vādo katamo imesaṃ sabbeva hīme kusalāvadānā.

[641] Yamāhu dhammaṃ paramanti eketi yaṃ dhammaṃ diṭṭhiṃ paṭipadaṃ maggaṃ eke samaṇabrāhmaṇā idaṃ paramaṃ aggaṃ seṭṭhaṃ viseṭṭhaṃ pāmokkhaṃ uttamaṃ pavaranti evamāhaṃsu evaṃ kathenti evaṃ bhaṇanti evaṃ dīpayanti evaṃ voharantīti yamāhu dhammaṃ paramanti eke.