[646] Sakaṃ hi dhammaṃ paripuṇṇamāhūti sakaṃ hi dhammaṃ diṭṭhiṃ paṭipadaṃ maggaṃ eke samaṇabrāhmaṇā idaṃ samattaṃ paripuṇṇaṃ anomanti evamāhaṃsu evaṃ kathenti evaṃ bhaṇanti evaṃ dīpayanti evaṃ voharantīti sakaṃ hi dhammaṃ paripuṇṇamāhu.

[647] Aññassa dhammaṃ pana hīnamāhūti aññassa dhammaṃ diṭṭhiṃ Paṭipadaṃ maggaṃ eke samaṇabrāhmaṇā hīnaṃ etaṃ nihīnaṃ etaṃ omakaṃ etaṃ lāmakaṃ ekaṃ jatukkaṃ etaṃ parittakaṃ etanti evamāhaṃsu evaṃ kathenti evaṃ bhaṇanti evaṃ dīpayanti evaṃ voharantīti aññassa dhammaṃ pana hīnamāhu.

[648] Evampi viggayha vivādayantīti evaṃ gahetvā gaṇhitvā parāmasitvā abhinivisitvā vivādayanti kalahaṃ karonti bhaṇḍanaṃ karonti viggahaṃ karonti vivādaṃ karonti medhagaṃ karonti na tvaṃ imaṃ dhammavinayaṃ ājānāsi .pe. nibbedhehi vā sace pahosīti evampi viggayha vivādayanti.

[649] Sakaṃ sakaṃ sammatimāhu saccanti sassato loko .pe. Neva hoti na na hoti tathāgato parammaraṇā idameva saccaṃ moghamaññanti sakaṃ sakaṃ sammatimāhu saccaṃ. Tenāha bhagavā sakaṃ hi dhammaṃ paripuṇṇamāhu aññassa dhammaṃ pana hīnamāhu evampi viggayha vivādayanti sakaṃ sakaṃ sammatimāhu saccanti.