[650] Parassa ce vambhayitena hīno na koci dhammesu visesi assa puthū hi aññassa vadanti dhammaṃ nihīnato samhi daḷhaṃvadānā.

[651] Parassa ce vambhayitena hīnoti parassa ce vambhayitakāraṇā ninditakāraṇā garahitakāraṇā upavaditakāraṇā paro bālo hoti hīno nihīno omako lāmako jatukko parittoti parassa ce vambhayitena hīno.

[652] Na koci dhammesu visesi assāti dhammesu na koci aggo seṭṭho viseṭṭho pāmokkho uttamo pavaro assāti na koci dhammesu visesi assa.

[653] Puthū hi aññassa vadanti dhammaṃ nihīnatoti bahukāpi bahunnaṃ dhammaṃ vadanti upavadanti nindanti garahanti hīnato nihīnato omakato lāmakato jatukkato parittato bahukāpi ekassa dhammaṃ vadanti upavadanti nindanti garahanti hīnato nihīnato omakato lāmakato jatukkato parittato ekopi bahunnaṃ dhammaṃ vadati upavadati nindati garahati hīnato nihīnato omakato lāmakato jatukkato parittato ekopi ekassa dhammaṃ vadati upavadati nindati garahati hīnato nihīnato omakato lāmakato jatukkato parittatoti puthū hi aññassa vadanti dhammaṃ nihīnato.