[654] Samhi daḷhaṃvadānāti dhammo sakāyanaṃ diṭṭhi sakāyanaṃ paṭipadā sakāyanaṃ maggo sakāyanaṃ . sakāyane daḷhavādā thiravādā balikavādā avaṭṭhitavādāti samhi daḷhaṃvadānā . tenāha bhagavā Parassa ce vambhayitena hīno na koci dhammesu visesi assa puthū hi aññassa vadanti dhammaṃ nihīnato samhi daḷhaṃvadānāti.

[655] Sadhammapūjā ca panā tatheva yathā pasaṃsanti sakāyanāni sabbe pavādā tathivā bhaveyyuṃ suddhī hi nesaṃ paccattameva.

[656] Sadhammapūjā ca panā tathevāti katamā sadhammapūjā . Sakaṃ satthāraṃ sakkaroti garukaroti māneti pūjeti ayaṃ satthā sabbaññūti ayaṃ sadhammapūjā . sakaṃ dhammakkhānaṃ sakaṃ gaṇaṃ sakaṃ diṭṭhiṃ sakaṃ paṭipadaṃ sakaṃ maggaṃ sakkaroti garukaroti māneti pūjeti ayaṃ maggo niyyānikoti ayaṃ sadhammapūjā . sadhammapūjā ca panā tathevāti sadhammapūjā tathā tacchā bhūtā yāthāvā aviparītāti sadhammapūjā ca panā tatheva.

[657] Yathā pasaṃsanti sakāyanānīti dhammo sakāyanaṃ diṭṭhi sakāyanaṃ paṭipadā sakāyanaṃ maggo sakāyanaṃ . sakāyanāni pasaṃsanti thomenti kittenti vaṇṇentīti yathā pasaṃsanti sakāyanāni.