[666] Jānāmi passāmi tatheva etanti jānāmīti paracittañāṇena vā jānāmi pubbenivāsānussatiñāṇena vā jānāmi . passāmīti maṃsacakkhunā vā passāmi dibbena vā cakkhunā passāmi. Tatheva etanti etaṃ tathaṃ tacchaṃ bhūtaṃ yāthāvaṃ aviparītanti jānāmi passāmi tatheva etaṃ.

[667] Diṭṭhiyā eke paccenti suddhinti diṭṭhiyā eke samaṇabrāhmaṇā suddhiṃ visuddhiṃ parisuddhiṃ muttiṃ vimuttiṃ parimuttiṃ paccenti . sassato loko idameva saccaṃ moghamaññanti diṭṭhiyā eke samaṇabrāhmaṇā suddhiṃ visuddhiṃ parisuddhiṃ muttiṃ vimuttiṃ Parimuttiṃ paccenti . asassato loko .pe. neva hoti na na hoti tathāgato parammaraṇā idameva saccaṃ moghamaññanti diṭṭhiyā eke samaṇabrāhmaṇā suddhiṃ visuddhiṃ parisuddhiṃ muttiṃ vimuttiṃ parimuttiṃ paccentīti diṭṭhiyā eke paccenti suddhiṃ.

[668] Addakkhi ce kiñhi tumassa tenāti addakkhīti paracittañāṇena vā addakkhi pubbenivāsānussatiñāṇena vā addakkhi maṃsacakkhunā vā addakkhi dibbena vā cakkhunā addakkhīti addakkhi ce . kiñhi tumassa tenāti tassa tena dassanena kiṃ kathaṃ [1]- dukkhapariññā atthi na samudayassa pahānaṃ atthi na maggabhāvanā atthi na phalasacchikiriyā atthi na rāgassa samucchedappahānaṃ atthi na dosassa samucchedappahānaṃ atthi na mohassa samucchedappahānaṃ atthi na kilesānaṃ samucchedappahānaṃ atthi na saṃsāravaṭṭassa ucchedo atthīti addakkhi ce kiñhi tumassa tena.

[669] Atisitvā aññena vadanti suddhinti te diṭṭhiyā suddhimaggaṃ visuddhimaggaṃ parisuddhimaggaṃ vodātamaggaṃ pariyodātamaggaṃ atikkamitvā samatikkamitvā vītikkamitvā aññatra satipaṭṭhānehi aññatra sammappadhānehi aññatra iddhippādehi aññatra indriyehi aññatra balehi aññatra bojjhaṅgehi aññatra ariyā aṭṭhaṅgikā maggā suddhiṃ visuddhiṃ parisuddhiṃ muttiṃ vimuttiṃ parimuttiṃ vadanti kathenti bhaṇanti dīpayanti voharantīti evampi atisitvā Aññena vadanti suddhiṃ . athavā buddhā ca buddhasāvakā ca paccekabuddhā ca tesaṃ diṭṭhiyā asuddhimaggaṃ avisuddhimaggaṃ aparisuddhimaggaṃ avodātamaggaṃ apariyodātamaggaṃ atikkamitvā samatikkamitvā vītivattitvā catūhi satipaṭṭhānehi catūhi sammappadhānehi catūhi iddhippādehi pañcahi indriyehi pañcahi balehi sattahi bojjhaṅgehi ariyena aṭṭhaṅgikena maggena suddhiṃ visuddhiṃ parisuddhiṃ muttiṃ vimuttiṃ parimuttiṃ vadanti kathenti bhaṇanti dīpayanti voharantīti evampi atisitvā aññena vadanti suddhiṃ. Tenāha bhagavā jānāmi passāmi tatheva etaṃ diṭṭhiyā eke paccenti suddhiṃ addakkhi ce kiñhi tumassa tena atisitvā aññena vadanti suddhinti.