[670] Passaṃ naro dakkhati nāmarūpaṃ disvāna vāññassati tānimeva kāmaṃ bahuṃ passatu appakaṃ vā na hi tena suddhiṃ kusalā vadanti.

[671] Passaṃ naro dakkhati nāmarūpanti passaṃ naroti paracittañāṇena vā passanto pubbenivāsānussatiñāṇena vā passanto maṃsacakkhunā vā passanto dibbena vā cakkhunā passanto nāmarūpaññeva dakkhati niccato sukhato attato na tesaṃ dhammānaṃ samudayaṃ Vā atthaṅgamaṃ vā assādaṃ vā ādīnavaṃ vā nissaraṇaṃ vā dakkhatīti passaṃ naro dakkhati nāmarūpaṃ.

[672] Disvāna vāññassati tānimevāti disvāti paracittañāṇena vā disvā pubbenivāsānussatiñāṇena vā disvā maṃsacakkhunā vā disvā dibbena vā cakkhunā disvā nāmarūpaññeva disvā ñassati niccato sukhato attato na tesaṃ dhammānaṃ samudayaṃ vā atthaṅgamaṃ vā assādaṃ vā ādīnavaṃ vā nissaraṇaṃ vā ñassatīti disvāna vāññassati tānimeva.

[673] Kāmaṃ bahuṃ passatu appakaṃ vāti kāmaṃ bahukaṃ vā passanto nāmarūpaṃ appakaṃ vā niccato sukhato attatoti kāmaṃ bahuṃ passatu appakaṃ vā.