[674] Na hi tena suddhiṃ kusalā vadantīti kusalāti ye te khandhakusalā dhātukusalā āyatanakusalā paṭiccasamuppādakusalā satipaṭṭhānakusalā sammappadhānakusalā iddhippādakusalā indriyakusalā balakusalā bojjhaṅgakusalā maggakusalā phalakusalā nibbānakusalā te kusalā paracittañāṇena vā pubbenivāsānussatiñāṇena vā maṃsacakkhunā vā dibbena vā cakkhunā nāmarūpadassanena suddhiṃ visuddhiṃ parisuddhiṃ muttiṃ vimuttiṃ parimuttiṃ na vadanti na kathenti na bhaṇanti na dīpayanti na voharantīti na hi tena suddhiṃ kusalā vadanti. Tenāha bhagavā Passaṃ naro dakkhati nāmarūpaṃ disvāna vāññassati tānimeva kāmaṃ bahuṃ passatu appakaṃ vā na hi tena suddhiṃ kusalā vadantīti.

[675] Nivissavādī na hi subbināyo pakappitaṃ diṭṭhi purekkharāno yaṃ nissito tattha subhaṃvadāno suddhiṃvado tattha tathaddasā so.

[676] Nivissavādī na hi subbināyoti sassato loko idameva saccaṃ moghamaññanti nivissavādī . asassato loko .pe. neva hoti na na hoti tathāgato parammaraṇā idameva saccaṃ moghamaññanti nivissavādī . na hi subbināyoti nivissavādī dubbinayo duññāpayo dunnijjhāpayo duppekkhāpayo duppasādayoti nivissavādī na hi subbināyo.

[677] Pakappitaṃ diṭṭhi purekkharānoti pakappitaṃ abhisaṅkhataṃ saṇṭhapitaṃ diṭṭhiṃ purakkhato purato katvā carati diṭṭhiddhajo diṭṭhiketu diṭṭhādhipateyyo diṭṭhiyā parivārito caratīti pakappitaṃ diṭṭhi purekkharāno.