[678] Yaṃ nissito tattha subhaṃvadānoti yaṃ nissitoti yaṃ satthāraṃ dhammakkhānaṃ gaṇaṃ diṭṭhiṃ paṭipadaṃ maggaṃ nissito sannissito Allīno upagato ajjhosito adhimuttoti yaṃ nissito . tatthāti sakāya diṭṭhiyā sakāya khantiyā sakāya ruciyā sakāya laddhiyā . Subhaṃvadānoti subhavādo sobhanavādo paṇḍitavādo dhīravādo ñāṇavādo hetuvādo lakkhaṇavādo kāraṇavādo ṭhānavādo sakāya laddhiyāti yaṃ nissito tattha subhaṃvadāno.

[679] Suddhiṃvado tattha tathaddasā soti suddhiṃvadoti suddhivādo visuddhivādo parisuddhivādo vodātavādo pariyodātavādo . Athavā suddhidassano visuddhidassano parisuddhidassano vodātadassano pariyodātadassanoti suddhiṃvado . tatthāti sakāya diṭṭhiyā sakāya khantiyā sakāya ruciyā sakāya laddhiyā . tathaddasā soti tathaṃ tacchaṃ bhūtaṃ yāthāvaṃ aviparītanti addasa addakkhi apassi paṭivijjhīti suddhiṃvado tattha tathaddasā so. Tenāha bhagavā nivissavādī na hi subbināyo pakappitaṃ diṭṭhi purekkharāno yaṃ nissito tattha subhaṃvadāno suddhiṃvado tattha tathaddasā soti.

[680] Na brāhmaṇo kappamupeti saṅkhaṃ na diṭṭhisārī napi ñāṇabandhu ñatvā ca so sammatiyo puthujjā upekkhatī uggahaṇanti maññe.

[681] Na brāhmaṇo kappamupeti saṅkhanti nāti paṭikkhepo . Brāhmaṇoti sattannaṃ dhammānaṃ bāhitattā brāhmaṇo .pe. Anissito tādi pavuccate sa brahmā . kappāti dve kappā taṇhākappo ca diṭṭhikappo ca .pe. ayaṃ taṇhākappo .pe. Ayaṃ diṭṭhikappo . saṅkhā vuccati ñāṇaṃ yā paññā pajānanā .pe. amoho dhammavicayo sammādiṭṭhi . na brāhmaṇo kappamupeti saṅkhanti brāhmaṇo saṅkhāya jānitvā tulayitvā tīrayitvā vibhāvayitvā vibhūtaṃ katvā sabbe saṅkhārā aniccāti sabbe saṅkhārā dukkhāti .pe. yaṅkiñci samudayadhammaṃ sabbantaṃ nirodhadhammanti saṅkhāya jānitvā tulayitvā tīrayitvā vibhāvayitvā vibhūtaṃ katvā taṇhākappaṃ vā diṭṭhikappaṃ vā [1]- na upeti na upagacchati na gaṇhāti na parāmasati nābhinivisatīti na brāhmaṇo kappamupeti saṅkhaṃ.