[682] Na diṭṭhisārī napi ñāṇabandhūti tassa dvāsaṭṭhī diṭṭhigatāni pahīnāni samucchinnāni vūpasantāni paṭippassaddhāni abhabbuppattikāni ñāṇagginā daḍḍhāni so diṭṭhiyā na yāyati na niyyati na vuyhati na saṃhariyati napi taṃ diṭṭhigataṃ sārato pacceti paccāgacchatīti na diṭṭhisārī. Napi ñāṇabandhūti aṭṭhasamāpattiñāṇena vā pañcābhiññāñāṇena vā micchāñāṇena vā taṇhābandhaṃ vā diṭṭhibandhaṃ vā na karoti na janeti na sañjaneti na Nibbatteti nābhinibbattetīti na diṭṭhisārī napi ñāṇabandhu.

[683] Ñatvā ca so sammatiyo puthujjāti ñatvāti ñatvā jānitvā tulayitvā tīrayitvā vibhāvayitvā vibhūtaṃ katvā sabbe saṅkhārā aniccāti sabbe saṅkhārā dukkhāti .pe. Yaṅkiñci samudayadhammaṃ sabbantaṃ nirodhadhammanti ñatvā jānitvā tulayitvā tīrayitvā vibhāvayitvā vibhūtaṃ katvāti ñatvā ca so . sammatiyoti vuccanti dvāsaṭṭhī diṭṭhigatāni [1]- . puthujjāti puthujjanehi janitā vā tā sammatiyoti puthujjā . puthunānājanehi janitā vā tā sammatiyoti puthujjāti ñatvā ca so sammatiyo puthujjā.

[684] Upekkhatī uggahaṇanti maññeti aññe taṇhāvasena diṭṭhivasena gaṇhanti parāmasanti abhinivisanti arahā upekkhati na gaṇhāti na parāmasati nābhinivisatīti upekkhatī uggahaṇanti maññe. Tenāha bhagavā na brāhmaṇo kappamupeti saṅkhaṃ na diṭṭhisārī napi ñāṇabandhu ñatvā ca so sammatiyo puthujjā upekkhatī uggahaṇanti maññeti.

[685] Visajja ganthāni munīdha loke vivādajātesu na vaggasārī Santo asantesu upekkhako so anuggaho uggahaṇanti maññe.