[689] Anuggaho uggahaṇanti maññeti aññe taṇhāvasena diṭṭhivasena gaṇhanti parāmasanti abhinivisanti arahā upekkhati Na gaṇhāti na parāmasati nābhinivisatīti anuggaho uggahaṇanti maññe. Tenāha bhagavā visajja ganthāni munīdha loke vivādajātesu na vaggasārī santo asantesu upekkhako so anuggaho uggahaṇanti maññeti.

[690] Pubbāsave hitvā nave akubbaṃ na chandagū nopi nivissavādī sa vippamutto diṭṭhigatehi dhīro na limpatī loke anattagarahī.

[691] Pubbāsave hitvā nave akubbanti pubbāsavā vuccanti atītā rūpaṃ vedanā saññā saṅkhārā viññāṇaṃ . Atīte saṅkhāre ārabbha ye kilesā uppajjeyyuṃ te kilese hitvā cajitvā pariccajitvā pajahitvā vinoditvā byantīkaritvā anabhāvaṅgamitvāti pubbāsave hitvā . nave akubbanti navā vuccanti paccuppannā rūpaṃ vedanā saññā saṅkhārā viññāṇaṃ . paccuppanne saṅkhāre ārabbha chandaṃ akubbamāno pemaṃ akubbamāno rāgaṃ akubbamāno ajanayamāno asañjanayamāno anibbattayamāno nābhinibbattayamānoti pubbāsave hitvā nave akubbaṃ.

[692] Na chandagū nopi nivissavādīti na chandagūti na chandāgatiṃ Gacchati na dosāgatiṃ gacchati na mohāgatiṃ gacchati na bhayāgatiṃ gacchati na rāgavasena gacchati na dosavasena gacchati na mohavasena gacchati na mānavasena gacchati na diṭṭhivasena gacchati na uddhaccavasena gacchati na vicikicchāvasena gacchati na anusayavasena gacchati na vaggehi dhammehi yāyati niyyati vuyhati saṃhariyatīti na chandagū . Nopi nivissavādīti sassato loko idameva saccaṃ moghamaññanti [1]- Nivissavādī asassato loko idameva saccaṃ moghamaññanti .pe. Neva hoti na na hoti tathāgato parammaraṇā idameva saccaṃ moghamaññanti nivissavādīti na chandagū nopi nivissavādī.