[693] Sa vippamutto diṭṭhigatehi dhīroti tassa dvāsaṭṭhī diṭṭhigatāni pahīnāni samucchinnāni vūpasantāni paṭippassaddhāni abhabbuppattikāni ñāṇagginā daḍḍhāni so diṭṭhigatehi vippamutto visaññutto vimariyādikatena cetasā viharatīti . dhīroti dhīro paṇḍito paññavā buddhimā ñāṇī vibhāvī medhāvīti sa vippamutto diṭṭhigatehi dhīro.
[694] Na limpatī loke anattagarahīti lepoti dve lepā taṇhālepo ca diṭṭhilepo ca .pe. ayaṃ taṇhālepo .pe. ayaṃ diṭṭhilepo . tassa taṇhālepo pahīno diṭṭhilepo paṭinissaṭṭho [3]- taṇhālepassa pahīnattā diṭṭhilepassa paṭinissaṭṭhattā anupalitto apāyaloke na limpati manussaloke na limpati devaloke Na limpati khandhaloke na limpati dhātuloke na limpati āyatanaloke na limpati na saṃlimpati nupalimpati alitto asaṃlitto anupalitto nikkhanto nissaṭṭho vippamutto visaññutto vimariyādikatena cetasā viharatīti na limpati loke . anattagarahīti dvīhi kāraṇehi attānaṃ garahati katattā ca akatattā ca . kathaṃ katattā ca akatattā ca attānaṃ garahati . kataṃ me kāyaduccaritaṃ akataṃ me kāyasucaritanti attānaṃ garahati kataṃ me vacīduccaritaṃ kataṃ me manoduccaritaṃ kato me pāṇātipāto .pe. katā me micchādiṭṭhi akatā me sammādiṭṭhīti attānaṃ garahati. Evaṃ katattā ca akatattā ca attānaṃ garahati. {694.1} Athavā sīlesumhi na paripūrikārīti attānaṃ garahati indriyesumhi aguttadvāroti bhojane amattaññumhīti jāgariyamananuyuttoti na satisampajaññena samannāgatoti abhāvitā me cattāro satipaṭṭhānāti abhāvitā me cattāro sammappadhānāti abhāvitā me cattāro iddhippādāti abhāvitāni me pañcindriyānīti abhāvitāni me pañca balānīti abhāvitā me satta bojjhaṅgāti abhāvito me ariyo aṭṭhaṅgiko maggoti dukkhaṃ me apariññātanti dukkhasamudayo me appahīnoti maggo me abhāvitoti nirodho me asacchikatoti attānaṃ garahati . evaṃ katattā ca akatattā ca attānaṃ garahati . evaṃ attagarahiyaṃ kammaṃ akubbamāno ajanayamāno Asañjanayamāno anibbattayamāno nābhinibbattayamāno anattagarahīti na limpatī loke anattagarahī. Tenāha bhagavā pubbāsave hitvā nave akubbaṃ na chandagū nopi nivissavādī sa vippamutto diṭṭhigatehi dhīro na limpatī loke anattagarahīti.