[702] Kathaṃ disvā nibbāti bhikkhūti kathaṃ disvā passitvā tulayitvā tīrayitvā vibhāvayitvā vibhūtaṃ katvā attano rāgaṃ nibbāpeti dosaṃ nibbāpeti mohaṃ nibbāpeti kodhaṃ upanāhaṃ makkhaṃ paḷāsaṃ issaṃ macchariyaṃ māyaṃ sāṭheyyaṃ thammaṃ sārambhaṃ mānaṃ atimānaṃ madaṃ pamādaṃ sabbe kilese sabbe duccarite sabbe darathe sabbe pariḷāhe sabbe santāpe sabbākusalābhisaṅkhāre nibbāpeti sameti upasameti vūpasameti paṭippassambheti . bhikkhūti kalyāṇaputhujjano vā bhikkhu sekho vā bhikkhūti kathaṃ disvā nibbāti bhikkhu.

[703] Anupādiyāno lokasmiṃ kiñcīti catūhi upādānehi anupādiyamāno aggaṇhayamāno aparāmasayamāno [2]- . Lokasminti apāyaloke manussaloke devaloke khandhaloke dhātuloke āyatanaloke . kiñcīti kiñci rūpagataṃ vedanāgataṃ saññāgataṃ saṅkhāragataṃ viññāṇagatanti anupādiyāno lokasmiṃ kiñci . Tenāha so nimmito pucchāmi taṃ ādiccabandhuṃ vivekaṃ santipadañca mahesiṃ kathaṃ disvā nibbāti bhikkhu anupādiyāno lokasmiṃ kiñcīti.

[704] Mūlaṃ papañcasaṅkhāyāti bhagavā mantā asmīti sabbamuparuddhe yākāci taṇhā ajjhattaṃ tāsaṃ vinayā sadā sato sikkhe.

[705] Mūlaṃ papañcasaṅkhāyāti bhagavā mantā asmīti sabbamuparuddheti papañcāyeva papañcasaṅkhā taṇhāpapañcasaṅkhā diṭṭhipapañcasaṅkhā. {705.1} Katamaṃ taṇhāpapañcassa mūlaṃ . avijjā mūlaṃ ayonisomanasikāro mūlaṃ asmimāno mūlaṃ ahirikaṃ mūlaṃ anottappaṃ mūlaṃ uddhaccaṃ mūlaṃ idaṃ taṇhāpapañcassa mūlaṃ. {705.2} Katamaṃ diṭṭhipapañcassa mūlaṃ . avijjā mūlaṃ ayonisomanasikāro mūlaṃ asmimāno mūlaṃ ahirikaṃ mūlaṃ anottappaṃ mūlaṃ uddhaccaṃ mūlaṃ idaṃ diṭṭhipapañcassa mūlaṃ. {705.3} Bhagavāti gāravādhivacanaṃ . apica bhaggarāgoti bhagavā. Bhaggadosoti bhagavā . bhaggamohoti bhagavā . bhaggamānoti bhagavā . Bhaggadiṭṭhīti bhagavā . bhaggakaṇṭakoti bhagavā . bhaggakilesoti bhagavā. Bhaji vibhaji paṭivibhaji dhammaratananti bhagavā . bhavānaṃ antakaroti bhagavā . bhāvitakāyoti bhagavā . bhāvitasīloti bhāvitacittoti bhāvitapaññoti bhagavā . bhaji vā bhagavā araññavanapatthāni Patthāni pantāni senāsanāni appasaddāni appanigghosāni vijanavātāni manussarāhaseyyakāni paṭisallānasārūpānīti bhagavā . bhāgī vā bhagavā cīvarapiṇḍapātasenāsanagilānapaccayabhesajjaparikkhārānanti bhagavā . bhāgī vā bhagavā attharasassa dhammarasassa vimuttirasassa adhisīlassa adhicittassa adhipaññāyāti bhagavā . bhāgī vā bhagavā catunnaṃ jhānānaṃ catunnaṃ appamaññānaṃ catunnaṃ arūpasamāpattīnanti bhagavā . bhāgī vā bhagavā aṭṭhannaṃ vimokkhānaṃ aṭṭhannaṃ abhibhāyatanānaṃ navannaṃ anupubbavihārasamāpattīnanti bhagavā . bhāgī vā bhagavā dasannaṃ saññābhāvanānaṃ dasannaṃ kasiṇasamāpattīnaṃ ānāpānassatisamādhissa asubhasamāpattiyāti bhagavā. {705.4} Bhāgī vā bhagavā catunnaṃ satipaṭṭhānānaṃ catunnaṃ sammappadhānānaṃ catunnaṃ iddhippādānaṃ pañcannaṃ indriyānaṃ pañcannaṃ balānaṃ sattannaṃ bojjhaṅgānaṃ ariyassa aṭṭhaṅgikassa maggassāti bhagavā . bhāgī vā bhagavā dasannaṃ tathāgatabalānaṃ catunnaṃ vesārajjānaṃ catunnaṃ paṭisambhidānaṃ channaṃ abhiññānaṃ channaṃ buddhadhammānanti bhagavā . bhagavāti netaṃ nāmaṃ mātarā kataṃ na pitarā kataṃ na bhātarā kataṃ na bhaginiyā kataṃ na mittāmaccehi kataṃ na ñātisālohitehi kataṃ na samaṇabrāhmaṇehi kataṃ na devatāhi kataṃ vimokkhantikametaṃ buddhānaṃ bhagavantānaṃ bodhiyā mūle saha sabbaññutañāṇassa paṭilābhā sacchikā paññatti yadidaṃ bhagavāti [1]-. {705.5} Mantā asmīti sabbamuparuddheti mantā vuccati paññā yā Paññā pajānanā .pe. amoho dhammavicayo sammādiṭṭhi . Asmīti rūpe asmīti māno asmīti chando asmīti anusayo vedanāya saññāya saṅkhāresu viññāṇe asmīti māno asmīti chando asmīti anusayo . mūlaṃ papañcasaṅkhāyāti bhagavā mantā asmīti sabbamuparuddheti papañcasaṅkhāya mūlañca asmimānañca mantāya sabbaṃ ruddheyya uparuddheyya nirodheyya vūpasameyya atthaṅgameyya paṭippassambheyyāti mūlaṃ papañcasaṅkhāyāti bhagavā mantā asmīti sabbamuparuddhe.