[708] Yaṅkiñci dhammamabhijaññā ajjhattaṃ athavāpi bahiddhā na tena thāmaṃ kubbetha na hi sā nibbuti sataṃ vuttā.

[709] Yaṅkiñci dhammamabhijaññā ajjhattanti yaṅkiñci attano guṇaṃ jāneyya kusale vā dhamme abyākate vā dhamme. {709.1} Katame attano guṇā. Uccākulā pabbajito vā assa mahākulā pabbajito vā assa mahābhogakulā pabbajito vā assa uḷārabhogakulā pabbajito vā assa ñāto yasassī gahaṭṭhapabbajitānanti vā assa lābhimhi cīvarapiṇḍapātasenāsanagilānapaccayabhesajja- parikkhārānanti vā assa suttantiko vā assa vinayadharo vā assa dhammakathiko vā assa āraññiko vā assa piṇḍapātiko vā assa paṃsukūliko vā assa tecīvariko vā assa sapadānacāriko vā assa khalupacchābhattiko vā assa nesajjiko vā assa yathāsanthatiko vā assa paṭhamassa jhānassa lābhīti vā assa dutiyassa jhānassa lābhīti vā assa tatiyassa jhānassa lābhīti vā assa catutthassa jhānassa lābhīti vā assa ākāsānañcāyatanasamāpattiyā lābhīti vā assa viññāṇañcāyatanasamāpattiyā ākiñcaññāyatanasamāpattiyā nevasaññānāsaññāyatanasamāpattiyā lābhīti vā assa ime vuccanti attano Guṇā . yaṅkiñci attano guṇaṃ jāneyya ājāneyya vijāneyya paṭivijāneyya paṭivijjheyyāti yaṅkiñci dhammamabhijaññā ajjhattaṃ . Athavāpi bahiddhāti upajjhāyassa vā ācariyassa vā te guṇā assūti ajjhattaṃ athavāpi bahiddhā.

[710] Na tena thāmaṃ kubbethāti attano vā guṇena paresaṃ vā guṇena thāmaṃ na kareyya thambhaṃ na kareyya mānaṃ na kareyya uṇṇatiṃ na kareyya uṇṇamaṃ na kareyya na tena mānaṃ janeyya na tena thaddho assa patthaddho paggahitasiroti na tena thāmaṃ kubbetha.

[711] Na hi sā nibbuti sataṃ vuttāti satānaṃ santānaṃ sappurisānaṃ buddhānaṃ buddhasāvakānaṃ paccekabuddhānaṃ sā nibbuti na vuttā nappavuttā na ācikkhitā na desitā na paññāpitā na paṭṭhapitā na vivaṭā na vibhattā na uttānīkatā nappakāsitāti na hi sā nibbuti sataṃ vuttā. Tenāha bhagavā yaṅkiñci dhammamabhijaññā ajjhattaṃ athavāpi bahiddhā na tena mānaṃ kubbetha na hi sā nibbuti sataṃ vuttāti.