[712] Seyyo na tena maññeyya nīceyyo athavāpi sarikkho Puṭṭho anekarūpehi nātumānaṃ vikappayaṃ tiṭṭhe.

[713] Seyyo na tena maññeyyāti seyyohamasmīti mānaṃ na janeyya jātiyā vā gottena vā kolaputtikena vā vaṇṇapokkharatāya vā dhanena vā ajjhenena vā kammāyatanena vā sippāyatanena vā vijjaṭṭhānena vā sutena vā paṭibhāṇena vā aññataraññatarena vā vatthunāti seyyo na tena maññeyya.

[714] Nīceyyo athavāpi sarikkhoti hīnohamasmīti omānaṃ na janeyya jātiyā vā gottena vā .pe. aññataraññatarena vā vatthunā sadisohamasmīti mānaṃ na janeyya jātiyā vā gottena vā kolaputtikena vā vaṇṇapokkharatāya vā dhanena vā ajjhenena vā kammāyatanena vā sippāyatanena vā vijjaṭṭhānena vā sutena vā paṭibhāṇena vā aññataraññatarena vā vatthunāti nīceyyo athavāpi sarikkho.

[715] Puṭṭho anekarūpehīti anekavidhehi ākārehi puṭṭho pareto samohito samannāgatoti puṭṭho anekarūpehi.