[716] Nātumānaṃ vikappayaṃ tiṭṭheti ātumāno vuccati attā attānaṃ kappento vikappento vikappaṃ āpajjanto na tiṭṭheyyāti nātumānaṃ vikappayaṃ tiṭṭhe. Tenāha bhagavā Seyyo na tena maññeyya nīceyyo athavāpi sarikkho puṭṭho anekarūpehi nātumānaṃ vikappayaṃ tiṭṭheti.

[717] Ajjhattameva upasame nāññato bhikkhu santimeseyya ajjhattaṃ upasantassa natthi attaṃ kuto nirattaṃ vā.

[718] Ajjhattameva upasameti ajjhattaṃ rāgaṃ sameyya dosaṃ sameyya mohaṃ sameyya kodhaṃ upanāhaṃ makkhaṃ paḷāsaṃ issaṃ macchariyaṃ māyaṃ sāṭheyyaṃ thambhaṃ sārambhaṃ mānaṃ atimānaṃ madaṃ pamādaṃ sabbe kilese sabbe duccarite sabbe darathe sabbe pariḷāhe sabbe santāpe sabbākusalābhisaṅkhāre sameyya upasameyya vūpasameyya nibbāpeyya paṭippassambheyyāti ajjhattameva upasame.

[719] Nāññato bhikkhu santimeseyyāti aññato asuddhimaggena micchāpaṭipadāya aniyyānapathena aññatra satipaṭṭhānehi aññatra sammappadhānehi aññatra iddhippādehi aññatra indriyehi aññatra balehi aññatra bojjhaṅgehi aññatra ariyā aṭṭhaṅgikā maggā santiṃ upasantiṃ vūpasantiṃ nibbutiṃ paṭippassaddhiṃ na eseyya na gaveseyya na pariyeseyyāti nāññato bhikkhu santimeseyya.