[720] Ajjhattaṃ upasantassāti ajjhattaṃ rāgaṃ santassa dosaṃ santassa .pe. sabbākusalābhisaṅkhāre santassa upasantassa vūpasantassa nibbutassa paṭippassaddhassāti ajjhattaṃ upasantassa.

[721] Natthi attaṃ kuto nirattaṃ vāti natthīti paṭikkhepo . Attanti sassatadiṭṭhi natthi nirattanti ucchedadiṭṭhi natthi . Attāti gahitaṃ natthi nirattāti muñcitabbaṃ natthi . yassa natthi gahitaṃ tassa natthi muñcitabbaṃ . yassatthi muñcitabbaṃ tassatthi gahitaṃ . gāhamuñcanaṃ samatikkanto arahā vuḍḍhiparihāniṃ vītivatto . So vuṭṭhavāso ciṇṇacaraṇo .pe. natthi tassa punabbhavoti natthi attaṃ kuto nirattaṃ vā. Tenāha bhagavā ajjhattameva upasame nāññato bhikkhu santimeseyya ajjhattaṃ upasantassa natthi attaṃ kuto nirattaṃ vāti.

[722] Majjhe yathā samuddassa ūmi no jāyati ṭhito hoti evaṃ ṭhito anejassa ussadaṃ bhikkhu na kareyya kuhiñci.

[723] Majjhe yathā samuddassa ūmi no jāyati ṭhito hotīti samuddo caturāsītiyojanasahassāni ubbedhena gambhīro heṭṭhā Cattāḷīsayojanasahassāni udakaṃ macchakacchapehi kampati upari cattāḷīsayojanasahassāni udakaṃ vātehi kampati majjhe cattāri yojanasahassāni udakaṃ na kampati na vikampati na calati na vedhati na pavedhati na sampavedhati anerito aghaṭṭito acalito aluḷito abhanto vūpasanto tatra ūmi no jāyati ṭhito hoti samuddoti evampi majjhe yathā samuddassa ūmi no jāyati ṭhito hoti . Athavā sattannaṃ pabbatānaṃ antarikāsu sīdantarasamuddo tatra udakaṃ na kampati na vikampati na calati na vedhati na pavedhati na sampavedhati anerito aghaṭṭito acalito aluḷito abhanto vūpasanto tatra ūmi no jāyati ṭhito hoti samuddoti evampi majjhe yathā samuddassa ūmi no jāyati ṭhito hoti.