[733] Gāmakathāya āvaraye sotanti gāmakathā vuccanti battiṃsa tiracchānakathā . seyyathīdaṃ . rājakathā corakathā mahāmattakathā senākathā bhayakathā yuddhakathā annakathā pānakathā vatthakathā yānakathā sayanakathā mālākathā gandhakathā ñātikathā gāmakathā nigamakathā nagarakathā janapadakathā itthīkathā purisakathā sūrakathā visikkhākathā kumbhaṭṭhānakathā pubbapetakathā nānattakathā lokakkhāyikā samuddakkhāyikā itibhavābhavakathā iti vāti gāmakathāya . āvaraye sotanti gāmakathāya sotaṃ āvareyya nivāreyya sannivāreyya rakkheyya gopeyya pidaheyya pacchindeyyāti gāmakathāya āvaraye sotaṃ.

[734] Rase ca nānugijjheyyāti rasoti mūlaraso khandharaso tacaraso pattaraso puppharaso phalaraso ambilaṃ madhuraṃ tittikaṃ kaṭukaṃ loṇikaṃ khārikaṃ lambilaṃ kasāvo sāduṃ asāduṃ sītaṃ uṇhaṃ . Santeke samaṇabrāhmaṇā rasagiddhā te jivhaggena rasaggāni pariyesantā āhiṇḍanti . te ambilaṃ labhitvā anambilaṃ pariyesanti anambilaṃ labhitvā ambilaṃ pariyesanti .pe. sītaṃ labhitvā uṇhaṃ pariyesanti uṇhaṃ labhitvā sītaṃ pariyesanti . te yaṃ yaṃ labhitvā tena tena na tussanti aparāparaṃ pariyesanti manāpikesu rasesu rattā giddhā gadhitā mucchitā ajjhopannā laggā laggitā palibuddhā . yassesā rasataṇhā pahīnā samucchinnā .pe. Ñāṇagginā daḍḍhā so paṭisaṅkhā yoniso āhāraṃ āhāreti neva davāya na madāya na maṇḍanāya na vibhūsanāya yāvadeva imassa kāyassa ṭhitiyā yāpanāya vihiṃsuparatiyā brahmacariyānuggahāya .pe. Phāsuvihāro cāti . yathā vaṇaṃ ālimpeyya yāvadeva āruhaṇatthāya yathā vā pana akkhaṃ abbhañjeyya yāvadeva bhārassa nittharaṇatthāya yathā vā pana puttamaṃsaṃ āhāreyya yāvadeva kantārassa nittharaṇatthāya evameva bhikkhu paṭisaṅkhā yoniso āhāraṃ āhāreti neva davāya .pe. Anavajjatā ca phāsuvihāro cāti rasataṇhaṃ pajaheyya vinodeyya byantīkareyya anabhāvaṅgameyya rasataṇhāya ārato assa virato paṭivirato nikkhanto nissaṭṭho vippamutto visaññutto vimariyādikatena cetasā vihareyyāti rase ca nānugijjheyya.