[742] Annānamatho pānānaṃ khādanīyānaṃ athopi vatthānanti annānanti odano kummāso sattu maccho maṃsaṃ . pānānanti aṭṭha pānāni ambapānaṃ jambūpānaṃ cocapānaṃ mocapānaṃ madhukapānaṃ muddhikapānaṃ sālukapānaṃ phārusakapānaṃ . aparānipi aṭṭha pānāni kosambapānaṃ kolapānaṃ badarapānaṃ ghaṭapānaṃ telapānaṃ yāgupānaṃ payopānaṃ rasapānaṃ . khādanīyānanti piṭṭhakhajjakaṃ puvakhajjakaṃ mūlakhajjakaṃ tacakhajjakaṃ pattakhajjakaṃ pupphakhajjakaṃ phalakhajjakaṃ . vatthānanti cha cīvarāni khomaṃ kappāsikaṃ koseyyaṃ kambalaṃ sāṇaṃ bhaṅganti annānamatho pānānaṃ khādanīyānaṃ athopi vatthānaṃ.

[743] Laddhā na sannidhiṃ kayirāti laddhāti laddhā labhitvā adhigantvā vinditvā paṭilabhitvā na kuhanāya na lapanāya na nemittakatāya na nippesikatāya na lābhena lābhaṃ nijigiṃsanatāya na dārudānena na veḷudānena na pattadānena na pupphadānena na phaladānena na sinānadānena na cuṇṇadānena na mattikadānena na dantakaṭṭhadānena na mukhodakadānena na pātukamyatāya na muggasūpatāya na pāribhaṭyatāya na pīṭhamaddikatāya na vatthuvijjāya na tiracchānavijjāya na aṅgavijjāya na nakkhattavijjāya na dūtagamanena na pahīnagamanena na jaṅghapesanikena na vejjakammena na navakammena na piṇḍapaṭipiṇḍakena Na dānānuppadānena dhammena samena laddhā labhitvā adhigantvā vinditvā paṭilabhitvāti laddhā . na sannidhiṃ kayirāti annasannidhiṃ pānasannidhiṃ vatthasannidhiṃ yānasannidhiṃ sayanasannidhiṃ gandhasannidhiṃ āmisasannidhiṃ na kareyya na janeyya na sañjaneyya na nibbatteyya nābhinibbatteyyāti laddhā na sannidhiṃ kayirā.

[744] Na ca parittase tāni alabbhamānoti annaṃ vā na labhāmi pānaṃ vā na labhāmi vatthaṃ vā na labhāmi kulaṃ vā na labhāmi gaṇaṃ vā na labhāmi āvāsaṃ vā na labhāmi lābhaṃ vā na labhāmi yasaṃ vā na labhāmi pasaṃsaṃ vā na labhāmi sukhaṃ vā na labhāmi cīvaraṃ vā na labhāmi piṇḍapātaṃ vā na labhāmi senāsanaṃ vā na labhāmi gilānapaccayabhesajjaparikkhāraṃ vā na labhāmi gilānupaṭṭhākaṃ vā na labhāmi appaññātomhīti na taseyya na uttaseyya na parittaseyya na bhāyeyya na santāsaṃ āpajjeyya abhiru assa acchambhī anutrāsī apalāyī pahīnabhayabheravo vigatalomahaṃso vihareyyāti na ca parittase tāni alabbhamāno . Tenāha bhagavā annānamatho pānānaṃ khādanīyānaṃ athopi vatthānaṃ laddhā na sannidhiṃ kayirā na ca parittase tāni alabbhamānoti.