[745] Jhāyī na pādalolassa virame kukkuccā nappamajjeyya athāsanesu sayanesu appasaddesu bhikkhu vihareyya.

[746] Jhāyī na pādalolassāti jhāyīti paṭhamenapi jhānena jhāyī dutiyenapi jhānena jhāyī tatiyenapi jhānena jhāyī catutthenapi jhānena jhāyī savitakkasavicārena pi jhānena jhāyī avitakkavicāramattenapi jhānena jhāyī avitakkaavicārenapi jhānena jhāyī sappītikenapi jhānena jhāyī nippītikenapi jhānena jhāyī pītisahagatenapi jhānena jhāyī sātasahagatenapi jhānena jhāyī sukhasahagatenapi jhānena jhāyī upekkhāsahagatenapi jhānena jhāyī suññatenapi jhānena jhāyī animittenapi jhānena jhāyī appaṇihitenapi jhānena jhāyī lokiyenapi jhānena jhāyī lokuttarenapi jhānena jhāyī jhānarato ekattamanuyutto sadatthagarukoti jhāyī. {746.1} Na pādalolassāti kathaṃ pādalolo hoti. Idhekacco pādalolo pādaloliyena samannāgato hoti ārāmena ārāmaṃ uyyānena uyyānaṃ gāmena gāmaṃ nigamena nigamaṃ nagarena nagaraṃ raṭṭhena raṭṭhaṃ janapadena janapadaṃ dīghacārikaṃ anavatthitacārikaṃ anuyutto viharati evampi pādalolo hoti . athavā bhikkhu antosaṅghārāme pādaloliyena samannāgato hoti na atthahetu na karaṇahetu uddhato Avūpasantacitto pariveṇato pariveṇaṃ gacchati vihārato vihāraṃ gacchati aḍḍhayogato aḍḍhayogaṃ gacchati pāsādato pāsādaṃ gacchati hammiyato hammiyaṃ gacchati guhato guhaṃ gacchati leṇato leṇaṃ gacchati kuṭito kuṭiṃ gacchati kūṭāgārato kūṭāgāraṃ gacchati aṭṭato aṭṭaṃ gacchati māḷato māḷaṃ gacchati uddaṇḍato uddaṇḍaṃ gacchati uddhositato uddhositaṃ gacchati upaṭṭhānasālato upaṭṭhānasālaṃ gacchati maṇḍalamāḷato maṇḍalamāḷaṃ gacchati rukkhamūlato rukkhamūlaṃ gacchati yattha vā pana bhikkhū nisīdanti tahiṃ gacchati. {746.2} Tattha ekassa vā dutiyo hoti dvinnaṃ vā tatiyo hoti tiṇṇaṃ vā catuttho hoti tattha bahuṃ samphappalāpaṃ lapati seyyathīdaṃ rājakathaṃ corakathaṃ mahāmattakathaṃ senākathaṃ bhayakathaṃ yuddhakathaṃ annakathaṃ pānakathaṃ vatthakathaṃ yānakathaṃ sayanakathaṃ mālākathaṃ gandhakathaṃ ñātikathaṃ gāmakathaṃ nigamakathaṃ nagarakathaṃ janapadakathaṃ itthīkathaṃ purisakathaṃ sūrakathaṃ visikkhākathaṃ kumbhaṭṭhānakathaṃ pubbapetakathaṃ nānattakathaṃ lokakkhāyikaṃ samuddakkhāyikaṃ itibhavābhavakathaṃ iti vā evampi pādalolo hoti . Na pādalolassāti pādaloliyaṃ pajaheyya vinodeyya byantīkareyya anabhāvaṅgameyya pādaloliyā ārato assa virato paṭivirato nikkhanto nissaṭṭho vippamutto visaññutto vimariyādikatena cetasā vihareyya careyya samācareyya iriyeyya vatteyya pāleyya yapeyya yāpeyya. Paṭisallānārāmo assa paṭisallānarato so ajjhattaṃ cetosamathamanuyutto Anirākatajjhāno vipassanāya samannāgato brūhetā suññāgārānaṃ jhāyī jhānarato ekattamanuyutto sadatthagarukoti jhāyī na pādalolassa.