[753] Āthabbaṇaṃ supinaṃ lakkhaṇaṃ no vidahe athopi nakkhattaṃ Virudañca gabbhakaraṇaṃ tikicchaṃ māmako na seveyya.

[754] Āthabbaṇaṃ supinaṃ lakkhaṇaṃ no vidahe athopi nakkhattanti āthabbaṇikā āthabbaṇaṃ payojenti nagare vā ruddhe saṅgāme vā paccupaṭṭhite paccatthikesu paccāmittesu ītiṃ uppādenti upaddavaṃ uppādenti rogaṃ uppādenti sulaṃ karonti visūcikaṃ karonti pajjarakaṃ karonti pakkhandikaṃ karonti evaṃ āthabbaṇikā āthabbaṇaṃ payojenti. {754.1} Supinapāṭhakā supinaṃ ādisanti yo pubbaṇhasamayaṃ supinaṃ passati evaṃ vipāko hoti yo majjhantikasamayaṃ supinaṃ passati evaṃ vipāko hoti yo sāyaṇhasamayaṃ supinaṃ passati evaṃ vipāko hoti yo purime yāme yo majjhime yāme yo pacchime yāme yo dakkhiṇena passena nipanno yo vāmena passena nipanno yo uttānanipanno yo avakujjanipanno yo candaṃ passati yo suriyaṃ passati yo mahāsamuddaṃ passati yo sinerupabbatarājaṃ passati yo hatthiṃ passati yo assaṃ passati yo rathaṃ passati yo pattiṃ passati yo senābyūhaṃ passati yo ārāmarāmaṇeyyakaṃ passati yo vanarāmaṇeyyakaṃ passati yo bhūmirāmaṇeyyakaṃ passati yo pokkharaṇirāmaṇeyyakaṃ passati evaṃ vipāko hoti evaṃ supinapāṭhakā supinaṃ ādisanti . lakkhaṇapāṭhakā lakkhaṇaṃ ādisanti maṇilakkhaṇaṃ Daṇḍalakkhaṇaṃ vatthalakkhaṇaṃ asilakkhaṇaṃ usulakkhaṇaṃ dhanulakkhaṇaṃ āvudhalakkhaṇaṃ itthīlakkhaṇaṃ purisalakkhaṇaṃ kumārīlakkhaṇaṃ kumāralakkhaṇaṃ dāsīlakkhaṇaṃ dāsalakkhaṇaṃ hatthilakkhaṇaṃ assalakkhaṇaṃ mahisalakkhaṇaṃ usabhalakkhaṇaṃ [1]- ajalakkhaṇaṃ meṇḍalakkhaṇaṃ kukkuṭalakkhaṇaṃ vaṭṭakalakkhaṇaṃ godhālakkhaṇaṃ kaṇṇikālakkhaṇaṃ kacchapalakkhaṇaṃ migalakkhaṇaṃ iti vā evaṃ lakkhaṇapāṭhakā lakkhaṇaṃ ādisanti. {754.2} Nakkhattapāṭhakā nakkhattaṃ ādisanti aṭṭhavīsati nakkhattāni iminā nakkhattena gharapaveso kattabbo iminā nakkhattena makuṭaṃ bandhitabbaṃ iminā nakkhattena vāreyyaṃ kāretabbaṃ iminā nakkhattena vījanihāro kattabbo iminā nakkhattena gharavāso kattabboti evaṃ nakkhattapāṭhakā nakkhattaṃ ādisanti . āthabbaṇaṃ supinaṃ lakkhaṇaṃ no vidahe athopi nakkhattanti āthabbaṇañca supinañca lakkhaṇañca nakkhattañca no vidaheyya na careyya na samācareyya na samādāya vatteyya athavā na gaṇheyya na uggaṇheyya na dhāreyya na upadhāreyya na upalakkheyya na yojeyyāti āthabbaṇaṃ supinaṃ lakkhaṇaṃ no vidahe athopi nakkhattaṃ.