[755] Virudañca gabbhakaraṇaṃ tikicchaṃ māmako na seveyyāti virudaṃ vuccati migacakkaṃ . migacakkapāṭhakā migacakkaṃ ādisanti sakuṇānaṃ vā catuppadānaṃ vā rudaṃ vassitaṃ jānanti evaṃ migacakkapāṭhakā migacakkaṃ ādisanti . gabbhakaraṇīyā gabbhaṃ saṇṭhapenti . Dvīhi kāraṇehi gabbho na saṇṭhāti pāṇakehi vā vātakuppehi vā . pāṇakānaṃ vā vātakuppānaṃ vā paṭighātāya osathaṃ denti evaṃ gabbhakaraṇīyā gabbhaṃ saṇṭhapenti . tikicchāti pañca tikicchā sālākiyaṃ sallakattiyaṃ kāyatikicchiyaṃ bhūtiyaṃ komārakavejjaṃ . Māmakoti buddhamāmako dhammamāmako saṅghamāmako so vā bhagavantaṃ mamāyati bhagavā vā taṃ puggalaṃ pariggaṇhāti. {755.1} Vuttaṃ hetaṃ bhagavatā ye te bhikkhave bhikkhū kuhā thaddhā lapā siṅgī unnaḷā asamāhitā na me te bhikkhave bhikkhū māmakā apagatā ca te bhikkhū bhikkhave imasmā dhammavinayā na ca te imasmiṃ dhammavinaye vuḍḍhiṃ virūḷhiṃ vepullaṃ āpajjanti ye ca kho te bhikkhave bhikkhū nikkuhā nillapā dhīrā athaddhā susamāhitā te ca kho me bhikkhave bhikkhū māmakā anapagatā ca te [4]- bhikkhū imasmā dhammavinayā te ca [5]- imasmiṃ dhammavinaye vuḍḍhiṃ virūḷhiṃ vepullaṃ āpajjantīti. Kuhā thaddhā lapā siṅgī unnaḷā asamāhitā na te dhamme virūhanti sammāsambuddhadesite nikkuhā nillapā dhīrā athaddhā susamāhitā te ve dhamme virūhanti sammāsambuddhadesiteti. {755.2} Virudañca gabbhakaraṇaṃ tikicchaṃ māmako na seveyyāti virudañca gabbhakaraṇañca tikicchañca māmako na seveyya na niseveyya na paṭiseveyya na careyya na samācareyya na samādāya vatteyya Athavā na gaṇheyya na uggaṇheyya na dhāreyya na upadhāreyya na upalakkheyya nappayujjeyyāti virudañca gabbhakaraṇaṃ tikicchaṃ māmako na seveyya. Tenāha bhagavā āthabbaṇaṃ supinaṃ lakkhaṇaṃ no vidahe athopi nakkhattaṃ virudañca gabbhakaraṇaṃ tikicchaṃ māmako na seveyyāti.