[756] Nindāya nappavedheyya na uṇṇameyya pasaṃsito bhikkhu lobhaṃ saha macchariyena kodhaṃ pesuṇiyañca panūdeyya.

[757] Nindāya nappavedheyyāti idhekacce bhikkhuṃ nindanti jātiyā vā gottena vā kolaputtikena vā vaṇṇapokkharatāya vā dhanena vā ajjhenena vā kammāyatanena vā sippāyatanena vā vijjaṭṭhānena vā sutena vā paṭibhāṇena vā aññataraññatarena vā vatthunā nindanti garahanti upavadanti . nindito garahito upavadito nindāya garahāya upavādena akittiyā avaṇṇahārikāya na vedheyya nappavedheyya na sampavedheyya na taseyya na uttaseyya na parittaseyya na bhāyeyya na santāsaṃ āpajjeyya abhiru assa acchambhī anutrāsī apalāyī pahīnabhayabheravo vigatalomahaṃso Vihareyyāti nindāya nappavedheyya.

[758] Na uṇṇameyya pasaṃsito bhikkhūti idhekacce bhikkhuṃ pasaṃsanti jātiyā vā .pe. aññataraññatarena vā vatthunā pasaṃsanti thomenti kittenti vaṇṇenti . pasaṃsito thomito kittito vaṇṇito pasaṃsāya thomanena kittiyā vaṇṇahārikāya uṇṇatiṃ na kareyya uṇṇamaṃ na kareyya mānaṃ na kareyya thambhaṃ na kareyya na tena thaddho assa patthaddho paggahitasiroti na uṇṇameyya pasaṃsito bhikkhu.

[759] Lobhaṃ saha macchariyena kodhaṃ pesuṇiyañca panūdeyyāti lobhoti yo lobho lubbhanā lubbhitattaṃ sārāgo sārajjanā sārajjitattaṃ abhijjhā lobho akusalamūlaṃ . macchariyanti pañca macchariyāni āvāsamacchariyaṃ .pe. gāho vuccati macchariyaṃ . Kodhoti yo cittassa āghāto paṭighāto paṭighaṃ paṭivirodho kopo pakopo sampakopo doso padoso sampadoso cittassa byāpatti manopadoso kodho kujjhanā kujjhitattaṃ doso dussanā dussitattaṃ byāpatti byāpajjanā byāpajjitattaṃ virodho paṭivirodho caṇḍikkaṃ assuropo anattamanatā cittassa . pesuṇiyanti idhekacco pisuṇavāco hoti ito sutvā amutra akkhātā imesaṃ bhedāya amutra vā sutvā imesaṃ akkhātā amūsaṃ bhedāya iti samaggānaṃ vā bhettā bhinnānaṃ vā anuppadātā vaggārāmo vaggarato vagganandī Vaggakaraṇiṃ vācaṃ bhāsitā hoti idaṃ vuccati pesuññaṃ . apica dvīhi kāraṇehi pesuññaṃ upasaṃharati piyakamyatāya vā bhedādhippāyo vā . Kathaṃ piyakamyatāya pesuññaṃ upasaṃharati . imassa piyo bhavissāmi manāpo bhavissāmi vissāsiko bhavissāmi abbhantariko bhavissāmi suhadayo bhavissāmīti evaṃ piyakamyatāya pesuññaṃ upasaṃharati . kathaṃ bhedādhippāyo pesuññaṃ upasaṃharati. {759.1} Kathaṃ ime nānā assu vinā assu vaggā assu dvidhā assu dvejjhā assu dvepakkhā assu bhijjeyyuṃ na samāgaccheyyuṃ dukkhaṃ na phāsu vihareyyunti evaṃ bhedādhippāyo pesuññaṃ upasaṃharati. Lobhaṃ saha macchariyena kodhaṃ pesuṇiyañca panūdeyyāti lobhañca macchariyañca kodhañca pesuññañca panūdeyya pajaheyya vinodeyya byantīkareyya anabhāvaṅgameyyāti lobhaṃ saha macchariyena kodhaṃ pesuṇiyañca panūdeyya. Tenāha bhagavā nindāya nappavedheyya na uṇṇameyya pasaṃsito bhikkhu lobhaṃ saha macchariyena kodhaṃ pesuṇiyañca panūdeyyāti.