[760] Kayavikkaye na tiṭṭheyya upavādaṃ bhikkhu na kareyya kuhiñci gāme ca nābhisajjeyya lābhakamyā janaṃ na lāpayeyya.

[761] Kayavikkaye na tiṭṭheyyāti ye kayavikkayā vinaye paṭikkhittā na te imasmiṃ atthe adhippetā . kathaṃ kayavikkaye tiṭṭhati . pañcannaṃ saddhiṃ pattaṃ vā cīvaraṃ vā aññaṃ vā kiñci parikkhāraṃ vañcaniyaṃ vā karonto udayaṃ vā patthayanto parivatteti evaṃ kayavikkaye tiṭṭhati . kathaṃ kayavikkaye na tiṭṭhati . pañcannaṃ saddhiṃ pattaṃ vā cīvaraṃ vā aññaṃ vā kiñci parikkhāraṃ na vañcaniyaṃ vā karonto na udayaṃ vā patthayanto parivatteti evaṃ kayavikkaye na tiṭṭhati . kayavikkaye na tiṭṭheyyāti kayavikkaye na tiṭṭheyya na santiṭṭheyya kayavikkayaṃ pajaheyya vinodeyya byantīkareyya anabhāvaṅgameyya kayavikkayā ārato assa virato paṭivirato nikkhanto nissaṭṭho vippamutto visaññutto vimariyādikatena cetasā vihareyyāti kayavikkaye na tiṭṭheyya.

[762] Upavādaṃ bhikkhu na kareyya kuhiñcīti katame upavādakarā kilesā . santeke samaṇabrāhmaṇā iddhimanto dibbacakkhukā paracittaviduno te dūratopi passanti āsannāpi na dissanti cetasāpi cittaṃ pajānanti . devatāpi kho santi iddhimantiniyo dibbacakkhukā paracittaviduniyo tā dūratopi passanti āsannāpi na dissanti cetasāpi cittaṃ pajānanti . te oḷārikehi vā kilesehi majjhimehi vā kilesehi sukhumehi vā kilesehi upavadeyyuṃ. Katame oḷārikā kilesā . kāyaduccaritaṃ vacīduccaritaṃ manoduccaritaṃ Ime vuccanti oḷārikā kilesā . katame majjhimā kilesā . Kāmavitakko byāpādavitakko vihiṃsāvitakko ime vuccanti majjhimā kilesā . katame sukhumā kilesā . ñātivitakko janapadavitakko amaravitakko parānuddayatāpaṭisaññutto vitakko lābhasakkāra- silokapaṭisaññutto vitakko anavaññattipaṭisaññutto vitakko ime vuccanti sukhumā kilesā . te oḷārikehi vā kilesehi majjhimehi vā kilesehi sukhumehi vā kilesehi upavadeyyuṃ . {762.1} Upavādaṃ na kareyya upavādakare kilese na kareyya na janeyya na sañjaneyya na nibbatteyya nābhinibbatteyya upavādakare kilese pajaheyya vinodeyya byantīkareyya anabhāvaṅgameyya upavādakarehi kilesehi ārato assa virato paṭivirato nikkhanto nissaṭṭho vippamutto visaññutto vimariyādikatena cetasā vihareyya . kuhiñcīti kuhiñci kimhici katthaci ajjhattaṃ vā bahiddhā vā ajjhattabahiddhā vāti upavādaṃ bhikkhu na kareyya kuhiñci.