[765] Na ca katthitā siyā bhikkhu na ca vācaṃ payuttaṃ bhāseyya pāgabbhiyaṃ na sikkheyya kathaṃ viggāhikaṃ na kathayeyya.

[766] Na ca katthitā siyā bhikkhūti idhekacco katthī hoti vikatthī so katthati [4]- ahamasmi sīlasampannoti vā vattasampannoti vā sīlabbattasampannoti vā jātiyā vā gottena vā kolaputtikena vā vaṇṇapokkharatāya vā dhanena vā ajjhenena vā kammāyatanena vā sippāyatanena vā vijjaṭṭhānena vā sutena vā paṭibhāṇena vā aññataraññatarena vā vatthunā uccākulā Pabbajitoti vā mahābhogakulā pabbajitoti vā uḷārabhogakulā pabbajitoti vā suttantikoti vā vinayadharoti vā dhammakathikoti vā āraññikoti vā .pe. nevasaññānāsaññāyatanasamāpattiyā lābhīti vā katthati vikatthati . evaṃ [1]- na vikattheyya vikatthaṃ pajaheyya vinodeyya byantīkareyya anabhāvaṅgameyya katthanā ārato assa virato paṭivirato nikkhanto nissaṭṭho vippamutto visaññutto vimariyādikatena cetasā vihareyyāti na ca katthitā siyā bhikkhu.

[767] Na ca vācaṃ payuttaṃ bhāseyyāti katamā payuttavācā. Idhekacco cīvarapayuttaṃ vācaṃ bhāsati piṇḍapātapayuttaṃ vācaṃ bhāsati senāsanapayuttaṃ vācaṃ bhāsati gilānapaccayabhesajjaparikkhārapayuttaṃ vācaṃ bhāsati ayaṃ vuccati payuttavācā . athavā cīvarahetu piṇḍapātahetu senāsanahetu gilānapaccayabhesajjaparikkhārahetu saccampi bhaṇati musāpi bhaṇati pisuṇampi bhaṇati apisuṇampi bhaṇati pharusampi bhaṇati apharusampi bhaṇati samphappalāpampi bhaṇati asamphappalāpampi bhaṇati mantāpi vācaṃ bhāsati ayampi vuccati payuttavācā . Athavā pasannacitto paresaṃ dhammaṃ deseti aho vata me dhammaṃ suṇeyyuṃ sutvā ca dhammaṃ pasīdeyyuṃ pasannā ca me pasannākāraṃ kareyyunti ayaṃ vuccati payuttavācā . na ca vācaṃ payuttaṃ bhāseyyāti antamaso dhammadesanāvācaṃ upādāya payuttavācaṃ na Bhāseyya na katheyya na bhaṇeyya na dīpayeyya na vohareyya payuttavācaṃ pajaheyya vinodeyya byantīkareyya anabhāvaṅgameyya payuttavācāya ārato assa virato paṭivirato nikkhanto nissaṭṭho vippamutto visaññutto vimariyādikatena cetasā vihareyyāti na ca vācaṃ payuttaṃ bhāseyya.