[769] Kathaṃ viggāhikaṃ na kathayeyyāti katamā viggāhikakathā . Idhekacco evarūpiṃ kathaṃ kattā hoti na tvaṃ imaṃ dhammavinayaṃ ājānāsi .pe. nibbedhehi vā sace pahosīti . Vuttaṃ hetaṃ bhagavatā viggāhikāya kho moggallāna kathāya sati kathābāhullaṃ pāṭikaṅkhaṃ kathābāhulle sati uddhaccaṃ uddhatassa asaṃvaro asaṃvutassa ārā cittaṃ samādhimhāti. Kathaṃ viggāhikaṃ na kathayeyyāti viggāhikakathaṃ na katheyya na bhaṇeyya na dīpayeyya na vohareyya viggāhikakathaṃ pajaheyya vinodeyya byantīkareyya anabhāvaṅgameyya viggāhikakathāya ārato assa virato paṭivirato nikkhanto nissaṭṭho vippamutto visaññutto vimariyādikatena cetasā vihareyyāti kathaṃ viggāhikaṃ na kathayeyya . Tenāha bhagavā na ca katthitā siyā bhikkhu na ca vācaṃ payuttaṃ bhāseyya pāgabbhiyaṃ na sikkheyya kathaṃ viggāhikaṃ na kathayeyyāti.

[770] Mosavajjena niyyetha sampajāno saṭhāni na kayirā atha jīvitena paññāya sīlabbattena nāññamatimaññe.

[771] Mosavajjena niyyethāti mosavajjaṃ vuccati musāvādo. Idhekacco sabhaggato vā parisaggato vā .pe. āmisakiñcikkhahetu vā sampajānamusā bhāsitā hoti idaṃ vuccati mosavajjaṃ . Apica tīhākārehi musāvādo hoti pubbeva tassa hoti musā bhaṇissanti bhaṇantassa hoti musā bhaṇāmīti bhaṇitassa hoti musā mayā bhaṇitanti imehi tīhākārehi musāvādo hoti. {771.1} Apica catūhākārehi pañcahākārehi chahākārehi sattahākārehi aṭṭhahākārehi musāvādo hoti pubbeva tassa hoti musā bhaṇissanti bhaṇantassa hoti musā bhaṇāmīti bhaṇitassa hoti musā mayā bhaṇitanti vinidhāya diṭṭhiṃ vinidhāya khantiṃ vinidhāya ruciṃ vinidhāya saññaṃ vinidhāya bhāvaṃ imehi aṭṭhahākārehi musāvādo hoti . mosavajjena niyyethāti mosavajjena niyyeyya mosavajjaṃ pajaheyya vinodeyya byantīkareyya anabhāvaṅgameyya mosavajjā ārato assa virato paṭivirato nikkhanto nissaṭṭho vippamutto visaññutto vimariyādikatena cetasā vihareyyāti mosavajjena niyyetha.