[774] Sutvā rusito bahuṃ vācaṃ samaṇānaṃ vā puthuvacanānaṃ pharusena ne na paṭivajjā na hi santo paṭisenikaroti .

[775] Sutvā rusito bahuṃ vācaṃ samaṇānaṃ vā puthuvacanānanti rusitoti dūsito khuṃsito ghaṭṭito vambhito garahito upavadito. Samaṇānanti yekeci ito bahiddhā paribbājupagatā paribbājasamāpannā . Puthuvacanānanti khattiyā ca brāhmaṇā ca vessā ca suddā ca gahaṭṭhā ca pabbajitā ca devā ca manussā ca. Te bahukāhi vācāhi aniṭṭhāhi akantāhi amanāpāhi akkoseyyuṃ paribhāseyyuṃ roseyyuṃ viroseyyuṃ [1]- heṭheyyuṃ viheṭheyyuṃ ghāteyyuṃ upaghāteyyuṃ upaghātaṃ kareyyuṃ . tesaṃ bahuṃ vācaṃ aniṭṭhaṃ akantaṃ amanāpaṃ sutvā suṇitvā uggahitvā upadhārayitvā upalakkhitvāti sutvā rusito bahuṃ vācaṃ samaṇānaṃ vā puthuvacanānaṃ.

[776] Pharusena ne na paṭivajjāti pharusenāti kakkhaḷena . Na paṭivajjāti na paṭibhaṇeyya akkosantaṃ na paccakkoseyya rosantaṃ na paṭiroseyya bhaṇḍanaṃ na paṭibhaṇḍeyya na kalahaṃ kareyya na bhaṇḍanaṃ kareyya na viggahaṃ kareyya na vivādaṃ kareyya na medhagaṃ kareyya kalahabhaṇḍanaviggahavivādamedhagaṃ pajaheyya vinodeyya byantīkareyya anabhāvaṅgameyya kalahabhaṇḍanaviggahavivādamedhagā ārato assa virato paṭivirato nikkhanto nissaṭṭho vippamutto visaññutto vimariyādikatena cetasā vihareyyāti pharusena ne na paṭivajjā.

[777] Na hi santo paṭisenikarotīti santoti rāgassa santattā santo dosassa mohassa kodhassa upanāhassa .pe. Sabbākusalābhisaṅkhārānaṃ santattā samitattā vūpasamitattā vijjhātattā nibbutattā vigatattā paṭippassaddhattā santo upasanto vūpasanto nibbuto paṭippassaddhoti santo . na hi santo paṭisenikarotīti santo paṭiseniṃ paṭimallaṃ paṭikaṇṭakaṃ paṭipakkhaṃ na karoti na janeti na sañjaneti na nibbatteti nābhinibbattetīti na hi santo paṭisenikaroti. Tenāha bhagavā sutvā rusito bahuṃ vācaṃ samaṇānaṃ vā puthuvacanānaṃ pharusena ne na paṭivajjā na hi santo paṭisenikarotīti.