[782] Sāsane gotamassa nappamajjeyyāti gotamasāsane buddhasāsane jinasāsane tathāgatasāsane devasāsane arahantasāsane . Nappamajjeyyāti sakkaccakārī assa sātaccakārī aṭṭhitakārī anolīnavuttiko anikkhittacchando anikkhittadhuro appamatto kusalesu dhammesu kadāhaṃ aparipūraṃ vā sīlakkhandhaṃ paripūreyyaṃ .pe. aparipūraṃ vā samādhikkhandhaṃ paññākkhandhaṃ vimuttikkhandhaṃ vimuttiñāṇadassanakkhandhaṃ kadāhaṃ apariññātaṃ vā dukkhaṃ parijāneyyaṃ appahīne vā kilese pajaheyyaṃ abhāvitaṃ vā maggaṃ bhāveyyaṃ asacchikataṃ vā nirodhaṃ sacchikareyyanti yo tattha chando ca vāyāmo ca ussāho ca ussoḷhī ca thāmo ca appaṭivānī ca satisampajaññañca ātappaṃ padhānaṃ adhiṭṭhānaṃ anuyogo appamādo kusalesu dhammesūti sāsane gotamassa nappamajjeyya. Tenāha bhagavā etañca dhammamaññāya vicinaṃ bhikkhu sadā sato sikkhe santīti nibbutiṃ ñatvā sāsane gotamassa nappamajjeyyāti.

[783] Abhibhū hi so anabhibhūto sakkhidhammaṃ anītihamadassī tasmā hi tassa bhagavato sāsane appamatto sadā namassamanusikkheti bhagavā.

[784] Abhibhū hi so anabhibhūtoti abhibhūtarūpā abhibhūtasaddā abhibhūtagandhā abhibhūtarasā abhibhūtaphoṭṭhabbā abhibhūtadhammā abhibhū anabhibhūto kehici kilesehi abhibhū hi pāpake akusale dhamme saṅkilesike ponobbhavike sadare dukkhavipāke āyatiṃ jātijarāmaraṇīyeti abhibhū hi so anabhibhūto.

[785] Sakkhidhammaṃ anītihamadassīti sakkhidhammanti na itihitihaṃ na itikirāya na paramparāya na piṭakasampadāya na takkahetu na nayahetu na ākāraparivitakkena na diṭṭhinijjhānakkhantiyā sāmaṃ sayamabhiññātaṃ attapaccakkhaṃ dhammaṃ addasi addakkhi apassi paṭivijjhīti sakkhidhammaṃ anītihamadassī.