[786] Tasmā hi tassa bhagavato sāsaneti tasmāti tasmā taṃkāraṇā taṃhetu tappaccayā taṃnidānā . tassa bhagavato sāsaneti tassa bhagavato sāsane gotamasāsane buddhasāsane jinasāsane tathāgata sāsane devasāsane arahantasāsaneti tasmā hi tassa bhagavato sāsane.

[787] Appamatto sadā namassamanusikkheti bhagavāti appamattoti sakkaccakārī assa .pe. appamatto kusalesu dhammesu . Sadāti sadā sabbadā .pe. pacchime vayokhandhe . namassanti kāyena vā namassamāno vācāya vā namassamāno cittena vā namassamāno anvatthapaṭipattiyā [1]- namassamāno dhammānudhammapaṭipattiyā [2]- namassamāno sakkāramāno garukāramāno mānayamāno pūjayamāno apacāyamāno . anusikkheti tisso sikkhā adhisīlasikkhā adhicittasikkhā adhipaññāsikkhā .pe. ayaṃ adhipaññāsikkhā . imā tisso sikkhā āvajjanto sikkheyya .pe. sacchikātabbaṃ sacchikaronto sikkheyya [5]- ācareyya samācareyya samādāya vatteyya. Bhagavāti gāravādhivacanaṃ .pe. sacchikā paññatti yadidaṃ bhagavāti appamatto sadā namassamanusikkheti bhagavā. Tenāha bhagavā abhibhū hi so anabhibhūto sakkhidhammaṃ anītihamadassī tasmā hi tassa bhagavato sāsane appamatto sadā namassamanusikkheti bhagavāti. Cuddasamo tuvaṭakasuttaniddeso niṭṭhito. ------------------