[790] Janaṃ passatha medhaganti jananti khattiyā ca brāhmaṇā ca vessā ca suddā ca gahaṭṭhā ca pabbajitā ca devā ca manussā ca . medhaganti medhagaṃ janaṃ kalahaṃ janaṃ viruddhaṃ janaṃ paṭiviruddhaṃ janaṃ āhatajanaṃ paccāhatajanaṃ āghātitajanaṃ paccāghātitajanaṃ passatha dakkhatha oloketha nijjhāyetha upaparikkhathāti janaṃ passatha medhagaṃ.

[791] Saṃvegaṃ kittayissāmīti saṃvegaṃ ubbegaṃ utrāsaṃ bhayaṃ pīḷanaṃ ghaṭṭanaṃ upaddavaṃ upasaggaṃ kittayissāmi pakittayissāmi ācikkhissāmi desissāmi paññāpissāmi paṭṭhapissāmi vivarissāmi vibhajissāmi uttānīkarissāmi pakāsissāmīti saṃvegaṃ kittayissāmi.

[792] Yathā saṃvijitaṃ mayāti yathā mayā attanāyeva [4]- saṃvejito ubbejito saṃvegamāpāditoti yathā saṃvijitaṃ mayā. Tenāha bhagavā attadaṇḍā bhayaṃ jātaṃ janaṃ passatha medhagaṃ saṃvegaṃ kittayissāmi yathā saṃvijitaṃ mayāti.

[793] Phandamānaṃ pajaṃ disvā macche appodake yathā aññamaññehi byāruddhe disvā maṃ bhayamāvisi.