[801] Icchaṃ bhavanamattanoti attano bhavaṃ tāṇaṃ leṇaṃ saraṇaṃ gatiṃ parāyanaṃ icchanto sādiyanto patthayanto pihayanto abhijappantoti icchaṃ bhavanamattano.

[802] Nāddasāsiṃ anositanti anajjhositaṃ na addasaṃ ajjhositaññeva addasaṃ . sabbaṃ yobbaññaṃ jarāya ositaṃ sabbaṃ ārogyaṃ byādhinā ositaṃ sabbaṃ jīvitaṃ maraṇena ositaṃ sabbaṃ lābhaṃ alābhena ositaṃ sabbaṃ yasaṃ ayasena ositaṃ sabbaṃ pasaṃsaṃ nindāya ositaṃ sabbaṃ sukhaṃ dukkhena ositaṃ. Lābho alābho yaso ayaso ca nindā ca pasaṃsā ca sukhadukkhañca ete aniccā manujesu dhammā asassatā vipariṇāmadhammāti. Nāddasāsiṃ anositaṃ. Tenāha bhagavā samantamasāro loko disā sabbā sameritā icchaṃ bhavanamattano nāddasāsiṃ anositanti.

[803] Osānetveva byāruddhe disvā me aratī ahu athettha sallaṃ addakkhiṃ duddasaṃ hadayassitaṃ.

[804] Osānetveva byāruddheti osānetvevāti sabbaṃ yobbaññaṃ jarā osāpeti sabbaṃ ārogyaṃ byādhi osāpeti sabbaṃ jīvitaṃ maraṇaṃ osāpeti sabbaṃ lābhaṃ alābho osāpeti sabbaṃ yasaṃ ayaso osāpeti sabbaṃ pasaṃsaṃ nindā osāpeti sabbaṃ sukhaṃ dukkhaṃ osāpetīti osānetveva . byāruddheti yobbaññakāmā sattā jarāya paṭiviruddhā ārogyakāmā sattā byādhinā paṭiviruddhā jīvitukāmā sattā maraṇena paṭiviruddhā lābhakāmā sattā alābhena paṭiviruddhā yasakāmā sattā ayasena paṭiviruddhā pasaṃsakāmā sattā nindāya paṭiviruddhā sukhakāmā sattā dukkhena viruddhā paṭiviruddhā āhatā paccāhatā āghātitā paccāghātitāti osānetveva byāruddhe.