[805] Disvā me aratī ahūti disvāti disvā passitvā tulayitvā tīrayitvā vibhāvayitvā vibhūtaṃ katvāti disvā . me aratīti yā arati yā anabhirati yā anabhiramanā yā ukkaṇṭhiyā yā paritasitā ahūti disvā me aratī ahu.

[806] Athettha sallaṃ addakkhinti athāti padasandhi .pe. Padānupubbatāmetaṃ athāti . etthāti sattesu . sallanti satta sallāni rāgasallaṃ dosasallaṃ mohasallaṃ mānasallaṃ diṭṭhisallaṃ sokasallaṃ kathaṃkathāsallaṃ . addakkhinti addasaṃ addakkhiṃ apassiṃ paṭivijjhinti athettha sallaṃ addakkhiṃ.

[807] Duddasaṃ hadayassitanti duddasanti duddasaṃ duddakkhaṃ duppassaṃ dubbujjhaṃ duranubujjhaṃ duppaṭivijjhaṃ . hadayassitanti hadayaṃ vuccati cittaṃ yaṃ cittaṃ mano mānasaṃ hadayaṃ paṇḍaraṃ mano manāyatanaṃ manindriyaṃ viññāṇaṃ viññāṇakkhandho tajjā manoviññāṇadhātu . Hadayassitanti hadayanissitaṃ cittanissitaṃ cittasannissitaṃ cittena sahagataṃ sahajātaṃ saṃsaṭṭhaṃ sampayuttaṃ ekuppādaṃ ekanirodhaṃ ekavatthukaṃ ekārammaṇanti duddasaṃ hadayassitaṃ. Tenāha bhagavā osānetveva byāruddhe disvā me aratī ahu athettha sallaṃ addakkhiṃ duddasaṃ hadayassitanti.

[808] Yena sallena otiṇṇo disā sabbā vidhāvati tameva sallaṃ abbuyha na dhāvati na sīdati.