[818] Sacco siyā appagabbhoti sacco siyāti saccavācāya samannāgato siyā sammādiṭṭhiyā samannāgato siyā ariyena aṭṭhaṅgikena maggena samannāgato siyāti sacco siyā . Appagabbhoti tīṇi pāgabbhiyāni kāyikaṃ pāgabbhiyaṃ vācasikaṃ pāgabbhiyaṃ cetasikaṃ pāgabbhiyaṃ .pe. idaṃ cetasikaṃ pāgabbhiyaṃ . yassīmāni tīṇi pāgabbhiyāni pahīnāni samucchinnāni vūpasantāni paṭippassaddhāni abhabbuppattikāni ñāṇagginā daḍḍhāni so vuccati appagabbhoti sacco siyā appagabbho.

[819] Amāyo rittapesuṇoti māyā vuccati vañcanikā cariyā . idhekacco kāyena duccaritaṃ caritvā vācāya duccaritaṃ caritvā manasā duccaritaṃ caritvā tassa paṭicchādanahetu pāpikaṃ icchaṃ paṇidahati mā maṃ jaññāti icchati mā maṃ jaññāti saṅkappeti mā maṃ jaññāti vācaṃ bhāsati mā maṃ jaññāti kāyena parakkamati . yā evarūpā māyā māyāvitā accasarā vañcanā nikati nikiraṇā niharaṇā pariharaṇā gūhanā parigūhanā chādanā paricchādanā anuttānīkammaṃ anāvikammaṃ vocchādanā pāpakiriyā ayaṃ vuccati māyā . yassesā māyā pahīnā samucchinnā vūpasantā paṭippassaddhā abhabbuppattikā ñāṇagginā daḍḍhā so Vuccati amāyo . rittapesuṇoti pesuññanti idhekacco pisuṇavāco hoti .pe. evaṃ bhedādhippāyo pesuññaṃ upasaṃharati . yassetaṃ pesuññaṃ pahīnaṃ samucchinnaṃ vūpasantaṃ paṭippassaddhaṃ abhabbuppattikaṃ ñāṇagginā daḍḍhaṃ so vuccati rittapesuṇo vigatapesuṇoti amāyo rittapesuṇo.

[820] Akkodhano lobhapāpakaṃ vevicchaṃ vitare munīti akkodhanoti hi kho vuttaṃ . apica kodho tāva vattabbo . dasahākārehi kodho jāyati .pe. yasseso kodho pahīno samucchinno vūpasanto paṭippassaddho abhabbuppattiko ñāṇagginā daḍḍho so vuccati akkodhano . kodhassa pahīnattā akkodhano kodhavatthussa pariññātattā akkodhano kodhahetussa ucchinnattā akkodhano . Lobhoti yo lobho lubbhanā lubbhitattaṃ .pe. abhijjhā lobho akusalamūlaṃ . vevicchaṃ vuccati pañca macchariyāni āvāsamacchariyaṃ .pe. Gāho vuccati macchariyaṃ. {820.1} Munīti monaṃ vuccati ñāṇaṃ yā paññā pajānanā .pe. saṅgajālamaticca so munīti . akkodhano lobhapāpakaṃ vevicchaṃ vitare munīti muni lobhapāpakañca vevicchañca atari uttari pattari samatikkami vītikkami vītivattayīti akkodhano lobhapāpakaṃ vevicchaṃ vitare muni . Tenāha bhagavā sacco siyā appagabbho amāyo rittapesuṇo akkodhano lobhapāpakaṃ vevicchaṃ vitare munīti.