[821] Niddaṃ tandiṃ sahe thīnaṃ pamādena na saṃvase atimāne na tiṭṭheyya nibbānamanaso naro.

[822] Niddaṃ tandiṃ sahe thīnanti niddāti yā kāyassa akalyatā akammaññatā onāho pariyonāho anto samorodho middhaṃ soppaṃ capalāyikā supinā supitattaṃ . tandīti yā tandi tandiyanā [2]- tandimanakatā ālasiyaṃ ālasāyanā ālasāyitattaṃ . Thīnanti yā cittassa akalyatā akammaññatā olīyanā sallīyanā līnaṃ līyanā līyitattaṃ thīnaṃ thīyanā thīyitattaṃ cittassa . niddaṃ tandiṃ sahe thīnanti niddañca tandiñca thīnañca [3]- saheyya parisaheyya abhibhaveyya ajjhotthareyya pariyādiyeyya maddeyyāti niddaṃ tandiṃ sahe thīnaṃ.

[823] Pamādena na saṃvaseti pamādo vattabbo. Kāyaduccaritena vā vacīduccaritena vā manoduccaritena vā pañcakāmaguṇesu cittassa vossaggo vossaggānuppadānaṃ vā kusalānaṃ vā dhammānaṃ bhāvanāya asakkaccakiriyatā asātaccakiriyatā anaṭṭhitakiriyatā olīnavuttitā nikkhittacchandatā nikkhittadhuratā anāsevanā abhāvanā abahulīkammaṃ anadhiṭṭhānaṃ ananuyogo pamādo yo evarūpo pamādo pamajjanā pamajjitattaṃ ayaṃ vuccati pamādo . pamādena na saṃvaseti pamādena na saṃvaseyya na āvaseyya na parivaseyya pamādaṃ pajaheyya vinodeyya byantīkareyya anabhāvaṅgameyya pamādā ārato Assa virato paṭivirato nikkhanto nissaṭṭho vippamutto visaññutto vimariyādikatena cetasā vihareyyāti pamādena na saṃvase.

[824] Atimāne na tiṭṭheyyāti atimānoti idhekacco paraṃ atimaññati jātiyā vā gottena vā .pe. aññataraññatarena vā vatthunā . yo evarūpo māno maññanā maññitattaṃ uṇṇati uṇṇamo dhajo sampaggāho ketukamyatā cittassa ayaṃ vuccati atimāno . atimāne na tiṭṭheyyāti atimāne na tiṭṭheyya na santiṭṭheyya atimānaṃ pajaheyya vinodeyya byantīkareyya anabhāvaṅgameyya atimānā ārato assa virato paṭivirato nikkhanto nissaṭṭho vippamutto visaññutto vimariyādikatena cetasā vihareyyāti atimāne na tiṭṭheyya.