[874] Natthi kāci nisaṅkhitīti nisaṅkhitiyo vuccanti puññābhisaṅkhāro apuññābhisaṅkhāro āneñjābhisaṅkhāro . yato puññābhisaṅkhāro ca apuññābhisaṅkhāro ca āneñjābhisaṅkhāro ca pahīnā honti ucchinnamūlā tālāvatthukatā anabhāvaṅgatā āyatiṃ anuppādadhammā ettāvatā nisaṅkhitiyo natthi na saṃvijjanti nupalabbhanti pahīnā samucchinnā vūpasantā paṭippassaddhā abhabbuppattikā ñāṇagginā daḍḍhāti natthi kāci nisaṅkhiti.

[875] Virato so viyārambhāti viyārambho vuccati puññābhisaṅkhāro apuññābhisaṅkhāro āneñjābhisaṅkhāro . yato puññābhisaṅkhāro ca apuññābhisaṅkhāro ca āneñjābhisaṅkhāro ca pahīnā honti ucchinnamūlā tālāvatthukatā anabhāvaṅgatā āyatiṃ anuppādadhammā ettāvatā viyārambhā ārato assa virato paṭivirato nikkhanto nissaṭṭho vippamutto visaññutto vimariyādikatena cetasā viharatīti virato so viyārambhā.

[876] Khemaṃ passati sabbadhīti bhayakaro rāgo bhayakaro doso bhayakaro moho .pe. bhayakarā kilesā . bhayakarassa rāgassa pahīnattā .pe. bhayakarānaṃ kilesānaṃ pahīnattā sabbattha khemaṃ passati sabbattha abhayaṃ passati sabbattha anītikaṃ passati Sabbattha anupaddavaṃ passati sabbattha anupasaggaṃ passati sabbattha passaddhaṃ passatīti khemaṃ passati sabbadhi. Tenāha bhagavā anejassa vijānato natthi kāci nisaṅkhiti virato so viyārambhā khemaṃ passati sabbadhīti.

[877] Na samesu na omesu na ussesu vadate muni santo so vītamaccharo nādeti na nirassatīti (bhagavā).