[885] Evaṃ vagguvado satthāti evaṃ vagguvado madhuravado pemanīyavado hadayaṅgamavado karavikarudamañjussaro . aṭṭhaṅgasamannāgato kho pana tassa bhagavato mukhato ghoso niccharati vissattho ca suviññeyyo ca mañju ca savanīyo ca bindu ca avisārī ca gambhīro ca ninnādi ca . yadā parisaṃ kho pana so bhagavā sarena viññāpeti na tassa bahiddhā parisāya ghoso niccharati . Brahmassaro kho pana so bhagavā karavikabhāṇīti evaṃ vagguvado. {885.1} Satthāti bhagavā satthavāho . Yathā satthavāho satthe kantāraṃ tāreti corakantāraṃ tāreti vāḷakantāraṃ tāreti dubbhikkhakantāraṃ tāreti nirudakakantāraṃ tāreti uttāreti nittāreti pattāreti khemantabhūmiṃ sampāpeti evameva bhagavā satthavāho satte kantāraṃ tāreti jātikantāraṃ tāreti jarākantāraṃ tāreti byādhikantāraṃ tāreti maraṇasokaparidevadukkhadomanassupāyāsakantāraṃ tāreti rāgakantāraṃ tāreti dosamohamānadiṭṭhikilesaduccaritakantāraṃ tāreti rāgagahanaṃ tāreti dosamohamānadiṭṭhigahanaṃ tāreti kilesagahanaṃ tāreti uttāreti nittāreti pattāreti khemantaṃ amataṃ nibbānaṃ Sampāpetīti evampi bhagavā satthavāho . athavā bhagavā netā vinetā anunetā saññāpetā nijjhāpetā pekkhatā pasādetāti evampi bhagavā satthavāho . athavā bhagavā anuppannassa maggassa uppādetā asañjātassa maggassa sañjanetā anakkhātassa maggassa akkhātā maggaññū maggavidū maggakovido . maggānugā ca pana etarahi sāvakā viharanti pacchāsamannāgatāti evampi bhagavā satthavāhoti evaṃ vagguvado satthā.
[886] Tusitā gaṇimāgatoti bhagavā tusitā kāyā cavitvā sato sampajāno mātukucchiṃ okkantoti evampi tusitā gaṇimāgato . athavā tusitā vuccanti devā . te tuṭṭhā santuṭṭhā attamanā pamuditā pītisomanassajātā tusitadevalokato gaṇimāgatoti evampi tusitā gaṇimāgato . athavā tusitā vuccanti arahanto . te tuṭṭhā santuṭṭhā attamanā paripuṇṇasaṅkappā arahantānaṃ gaṇimāgatoti evampi tusitā gaṇimāgato . gaṇīti gaṇī . bhagavā gaṇācariyoti gaṇī . gaṇassa satthāti gaṇī . Gaṇaṃ pariharatīti gaṇī . gaṇaṃ ovadatīti gaṇī . gaṇamanusāsatīti gaṇī . visārado gaṇaṃ upasaṅkamatīti gaṇī . gaṇassa sussūsati sotaṃ odahati aññācittaṃ upaṭṭhapetīti gaṇī . gaṇaṃ akusalā vuṭṭhāpetvā kusale patiṭṭhāpetīti gaṇī . bhikkhugaṇassa gaṇī . Bhikkhunīgaṇassa gaṇī . upāsakagaṇassa gaṇī . upāsikāgaṇassa Gaṇī . rājagaṇassa gaṇī . khattiyagaṇassa brāhmaṇagaṇassa vessagaṇassa suddagaṇassa devagaṇassa brahmagaṇassa gaṇī . Saṅghī gaṇī gaṇācariyo āgato upagato samupagato sampatto saṅkassanagaranti tusitā gaṇimāgato. Tenāha sārīputtatthero na me diṭṭho ito pubbe (iccāyasmā sārīputto) na suto uda kassaci evaṃ vagguvado satthā tusitā gaṇimāgatoti.