[897] Gaṇimāgatanti gaṇīti gaṇī . bhagavā gaṇācariyoti gaṇī . Gaṇassa satthāti gaṇī . gaṇaṃ pariharatīti gaṇī . gaṇaṃ ovadatīti gaṇī. Gaṇaṃ anusāsatīti gaṇī . visārado gaṇaṃ upasaṅkamatīti gaṇī . gaṇassa sussūsati sotaṃ odahati aññācittaṃ upaṭṭhapetīti gaṇī . gaṇaṃ akusalā vuṭṭhāpetvā kusale patiṭṭhapetīti gaṇī . bhikkhugaṇassa gaṇī . bhikkhunīgaṇassa gaṇī . upāsakagaṇassa gaṇī . upāsikāgaṇassa gaṇī . rājagaṇassa gaṇī . khattiyagaṇassa gaṇī . brāhmaṇagaṇassa gaṇī . vessagaṇassa gaṇī . suddagaṇassa gaṇī . brahmagaṇassa gaṇī . Devagaṇassa gaṇī . saṅghī gaṇī gaṇācariyo āgato upāgato samupāgato sampatto saṅkassanagaranti akuhaṃ gaṇimāgataṃ.

[898] Bahunnamidha baddhānanti bahunnanti bahunnaṃ khattiyānaṃ brāhmaṇānaṃ vessānaṃ suddānaṃ gahaṭṭhānaṃ pabbajitānaṃ devānaṃ manussānaṃ . baddhānanti baddhānaṃ baddhacarānaṃ paricārikānaṃ sissānnti bahunnamidha baddhānaṃ.

[899] Atthi pañhena āgamanti pañhena atthiko āgatomhi pañhaṃ pucchitukāmo āgatomhi pañhaṃ sotukāmo āgatomhīti evampi atthi pañhena āgamaṃ . athavā pañhatthikānaṃ pañhapucchakānaṃ pañhaṃ sotukāmānaṃ āgamanaṃ abhikkamanaṃ upasaṅkamanaṃ payirupāsanā siyāti evampi atthi pañhena āgamaṃ . athavā pañhāgamo tuyhaṃ atthi [1]- tvamasi alamatto mayā pucchitaṃ kathetuṃ vissajjetuṃ vattussetaṃ bhāranti evampi atthi pañhena āgamaṃ . Tenāha sārīputtatthero taṃ buddhaṃ asitaṃ tādiṃ akuhaṃ gaṇimāgataṃ bahunnamidha baddhānaṃ atthi pañhena āgamanti.

[900] Bhikkhuno vijigucchato bhajato rittamāsanaṃ rukkhamūlaṃ susānaṃ vā pabbatānaṃ guhāsu vā.