[907] Gīvanto tattha bheravāti gīvantoti gīvanto kujjanto nadanto saddaṃ karonto . athavā kīvanto katī kittakā kīvatakā kīvabahukā . te bheravāti sīhā byagghā dīpi acchataracchā kokā Gomahisā hatthī ahi vicchikā satapadī corā vā assu māṇavā katakammā vā akatakammā vāti gīvanto tattha bheravā.

[908] Yehi bhikkhu na vedheyyāti yehīti yehi bheravehi bherave passitvā vā suṇitvā vā na vedheyya nappavedheyya na sampavedheyya na taseyya na uttaseyya na parittaseyya na bhāyeyya na santāsaṃ āpajjeyya abhiru assa acchambhī anutrāsī apalāyī pahīnabhayabheravo vigatalomahaṃso vihareyyāti yehi bhikkhu na vedheyya.

[909] Nigghose sayanāsaneti appasadde appanigghose vijanavāte manussarāhaseyyake paṭisallānasāruppe senāsaneti nigghose sayanāsane. Tenāha sārīputtatthero uccāvacesu sayanesu gīvanto tattha bheravā yehi bhikkhu na vedheyya nigghose sayanāsaneti.

[910] Katī parissayā loke gacchato agataṃ disaṃ ye bhikkhu abhisambhave pantamhi sayanāsane.