[912] Gacchato agataṃ disanti agatadisā vuccati amatanibbānaṃ yo so sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānaṃ . agatapubbā na disā gatapubbā iminā dīghena addhunā . samatittikaṃ anavasesaṃ telapattaṃ yathā parihareyya evaṃ sacittamanurakkheyya patthayamāno disaṃ agatapubbaṃ . agatapubbaṃ disaṃ Vajato gacchato abhikkamatoti gacchato agataṃ disaṃ.

[913] Ye bhikkhu abhisambhaveti yeti ye parissaye abhisambhaveyya abhibhaveyya ajjhotthareyya pariyādiyeyya maddeyyāti ye bhikkhu abhisambhave.

[914] Pantamhi sayanāsaneti ante pante pariyante selante vā vanante vā udakante vā nadante vā yattha na kasiyati na vapiyati janantaṃ atikkamitvā manussānaṃ anūpacāre senāsaneti pantamhi sayanāsane. Tenāha sārīputtatthero katī parissayā loke gacchato agataṃ disaṃ ye bhikkhu abhisambhave pantamhi sayanāsaneti.

[915] Kyāssa byappathayo assu kyāssassu idha gocarā kāni sīlabbatānassu pahitattassa bhikkhuno.