[926] Rittāsanaṃ sayanaṃ sevato ceti āsanaṃ vuccati yattha nisīdati mañco pīṭhaṃ bhisi taṭṭikā cammakhaṇḍo tiṇasanthāro paṇṇasanthāro palāsasanthāro . sayanaṃ vuccati senāsanaṃ vihāro aḍḍhayogo pāsādo hammiyaṃ guhā . [2]- sayanāsanaṃ asappāyarūpadassanena rittaṃ vivittaṃ pavivittaṃ asappāyasaddassavanena .pe. asappāyehi pañcahi kāmaguṇehi rittaṃ vivittaṃ pavivittaṃ . [3]- Rittaṃ sayanāsanaṃ sevato nisevato saṃsevato paṭisevatoti rittāsanaṃ sayanaṃ sevato ce.

[927] Sambodhikāmassa yathānudhammanti sambodhi vuccati catūsu maggesu ñāṇaṃ paññā paññindriyaṃ paññābalaṃ dhammavicayasambojjhaṅgo vīmaṃsā vipassanā sammādiṭṭhi .pe. Taṃ sambodhiṃ bujjhitukāmassa anubujjhitukāmassa paṭibujjhitukāmassa sambujjhitukāmassa adhigantukāmassa phassetukāmassa sacchikātukāmassāti sambodhikāmassa . yathānudhammanti katame bodhiyā anudhammā . sammāpaṭipadā anulomapaṭipadā apaccanīkapaṭipadā anvatthapaṭipadā dhammānudhammapaṭipadā sīlesu paripūrikāritā indriyesu guttadvāratā bhojane mattaññutā jāgariyānuyogo satisampajaññaṃ ime vuccanti bodhiyā anudhammā . athavā catunnaṃ maggānaṃ pubbabhāge vipassanā ime vuccanti bodhiyā anudhammāti sambodhikāmassa yathānudhammaṃ.

[928] Tante pavakkhāmi yathāpajānanti tanti bodhiyā anudhammaṃ . pavakkhāmīti vakkhāmi pavakkhāmi ācikkhissāmi desissāmi paññāpessāmi paṭṭhapessāmi vivarissāmi vibhajissāmi uttānīkarissāmi pakāsissāmi . yathāpajānanti yathā [1]- pajānanto ājānanto vijānanto paṭivijānanto paṭivijjhanto na itihitihaṃ na itikirāya na paramparāya na piṭakasampadāya na takkahetu na nayahetu na ākāraparivitakkena na diṭṭhinijjhānakkhantiyā sāmaṃ sayamabhiññātaṃ attapaccakkhaṃ dhammaṃ taṃ kathayissāmīti tante pavakkhāmi yathāpajānaṃ . tenāha bhagavā Vijigucchamānassa yadidaṃ phāsu (sārīputtāti bhagavā) rittāsanaṃ sayanaṃ sevato ce sambodhikāmassa yathānudhammaṃ tante pavakkhāmi yathāpajānanti.